Ka mukotduma wa yatoh wa i tih mooyong pyrchah aiñ hapoh ka jylla Meghalaya, da chong bichaar biang yaka ynnin ka 7 tarik da ka High Court ka Meghalaya heiwa u Justice B.P. Katakey (Rtd) uwa da thung yow pait yei pynkrehkaam yaka hukum ka NGT waka Supreme, da wanrah u yaka bui wa khynde namo ka 9th Interim Report kawa da ong wa ka sorkar jylla dang pteiñ hi ko wow lehke wei kheiñstiñ wow pynkrehkaam yeiwa da phah leh ka yung bichaar.
Hadien wa lai chim yukheiñ biang ya u mooyong wa da dep tih yow dai lilam noh, u Chief Secretary ka jylla haka Report wa da phah haka 20-09-22 da pyntip u wa em 32,56,715 MT u mooyong wa da toh u dai lilam tangwa hadien wa khang wot wow tih mooyong wei da lai chim yukheiñ da u Justice Katakey ya u mooyong wa da dep tih, da chem wa em u 19,54,258.816 MT heiwa ka yung bichaar da kylli ko neiwon mih tam sa 13 lak MT lada ym toh wa da pteiñ i tih ya u mooyong pyrchah yaka aiñ.
Chooh chooh ka High Court da ong ko wa ye u em palat yaka 32.546 lak MT u mooyong ya iwa da pynbna da u Chief Secretary hawa pait yei rukom man i kaam.
Ka High Court da kylli ko leh wa neiwon yoh mooyong ki karkhana Coke wa ki Ferro Alloys Plant kiwa boon da krehkaam khlem yoh bor, wei da phah leh ya ki wow khana noh ki neiwon yoh mooyong ki wei yeini da pynkitkhlieh ha u Secretary ka Mining & Geology Department.
Ka sorkar da pyntip ko leh wa da slem wow lilam ya u mooyong toh neidaw wa u Justice Katakey da phah pyndait u ya ki kor GPS ha ki kari wei ini da chimpor i wow leh wei da antaad wow pyndep yeini hadien wa kut uni u bnai (December 2022).
U Justice Katakey da paan pynche u leh na u DC ka East Jaiñtia Hills yei em hei maa ki krem neidaw wa joor tih ya ki mar pohkhyndaw deiwa pynemkaam leh ya ki tiar tympdung iwa da ktah ya ka Krem Lait Prah wa em ha Shnongrim, East Jaiñtia Hills. Neiliang u DC da pyntip u wa da pnykrehkaam daka Section-144 yow khang ya ini waroh.
Hajrong ini, ka High Court da sñiaw ko wa ym ye ki bor District u khang yei tih mooyong wei da pteiñ i pyrchah yaka aiñ heiwa ka hukum warim da ong wa lada ym ye u khang yeini daw pynngat hapoh ka Contempt of Court wei da pynngat syndon yeini ya u SP ka East Jaiñtia Hills.
Heiyatoh wa i dai lilam ya u mooyong, ka yung bichaar da ong ko wa toh u lai i chakhmat deiwa bood yaki kyndon wa da booh da u Justice Katakey wei wow pynemkaam leh yaka Drone Videography khlem pynslem de wei toh u dai lilam ya waroh u 32.56.715 MT wa da pynoo u Chief Secretary hapoh ka Report yong oo.
Ya ka mukotduma u chong bichaar biang haka 07-02-23.
