Phah ka HC wow pynkylla ya ki Certificate yong ka Transgender Doctor wa nyngkong ka Northeast

Ka Manipur High Court da phah ko ya ka Board of Secondary Education Manipur (BOSEM), ka Council of Higher Secondary Education Manipur (COHSEM), ka Manipur University (MU) wa ka Manipur Medical Council yow e ya ki Certificate wa thymme kawa man kam i pyrtuid thymme wa toh ka Transgender neibynta ka Dr. Beoncy Laishram, kawa man ka Transgender Doctor wa nyngkong ka Northeast, India.

Ya kani ka hukum da pynmih da ka miej bichaar u Justice A Guneshor Sharma hawa ap ya ka mukotduma wa da yaleh da ka Dr. Beoncy Laishram, kawa da jooh tip kam u Boboi Laishram heipor wa dang man ko kam u chynrang iwa da thoh leh ha waroh ki Certictae wa da yoh ko na ki thaw wa jooh lai puræ ko.

Hadien wa pyndep ko ya ka Gender Reassignment Surgery ha u 2019, u District Magistrate ka Imphal West, da e u da ka Transgender Certificate wa ka Identity Card iwa em wei pyrtuid thymme “Dr. Beoncy Laishram” heiwa da ong leh wa toh ka kynthai katkam ka Section 6 wa 7 ka Transgender Persons (Protection of Rights) Act, 2019. Wei da pynkylla leh yeini ha u Aadhaar, PAN wa Voter ID.

Tangwa hadien ini ka BOSEM, ka COHSEM wa ka MU da kyntait ki wow pynkylla yei pyrtuid ko cheiwa thymme kamjooh wow thoh wa da man ko kam ka kynthai deiwa ong wym em ki kyndon (Rules) ha ki By-Laws deiwa ong wa lada toh u pynkylla toh u leh nadooh ki por wa yaleh Matric. Hajrong ini, ka High Court da ong ko wa kiwon kiwon ki thaw puræ (Educational Institution) næ kiwi de hap ki wow bood ya ka Section 6, 7 wa 10 ka aiñ Transgender Persons (Protection of Rights) Act, 2019 yow pynbait neibynta ki Transgender.

Related posts

Ye u hiar dor ki kari khian lada lai bait i pynkylla yei dan ka GST

August 24, 2025

Ym slem de u wai noh ya ka yung krehkaam thymme ka Thadlaskeiñ C&RD Block

August 24, 2025

Ka yung bichaar da kyntait ko yei e daw ka BOSEM, COHSEM wa MU, deiwa pynche wa ka Transgender Act, 2019 toh ka aiñ wa kyrpang kawa ye wow ban ya kiwi won ki aiñ heiwa kani ka aiñ da ong ko wa hap wow pynthymme ya ki kot ki sla deiwa booh dei pyrtuid wa tymme wa kamjooh yei man chynrang næ kynthai.

Kamtæ ka High Court da phah ko ya ka BOSEM, COHSEM, MU wa ka Manipur Medical Council wow e ya ki Certificate wa thymme neibynta ka Dr. Beoncy Laishram hapoh u Nakhynde uni u snem. Chooh chooh da ong wa ka Section 6 wa 7 kani ka aiñ toh u kheiñ kawa da emlang hapoh waroh ki aiñ wa ki Bye-Laws ka Manipur kat wym pu ye wow pynkylla ya ki aiñ katkam wa emkaam.

Da phah leh ya u Chief Secretary ka Manipur wow phah ya waroh ki thaw puræ yow bood ki ya kani ka hukum.