Heiyatoh waka mukotduma wow yada ya ka Umiam, ka High Court da ong ko wa katni da yoo wa ka KHADC da chimkhia ko wow yada yei soodong kani ka wah wei kamjooh ya ka um tangwa da kdaw yei mih boon ki yung kiwa da chna hajan ka Umiam kiwa khlem em wa pait wa bood kyndon heiwa ka Meghalaya State Pollution Control Board (MSPCB) hawa e jubab haka 14 tarik uni u bnai da ong ko wa da em le tylli ki yung wa dang chna ki wym em bood ya ki kyndon kiwa em hajan kani ka um.
Neiliang ka KHADC da pyntip ko cha ka High Court wa ki dorbar chnong da e bor ki wow chna ya le tylli ki yung wa heh kiwa da e bor wow booh ya ka Showroom kari ha rood u sarok wa em pyrchah naka Umiam heiwa ka High Court da ong ko wa i jhep wa i jakhlia wa mih na kini daw ktah ko ya ka um.
Ka sorkar won da e jubab ko wa katkam ka aiñ hap wow leh ya ka Environment Impact Assessment yow pait kammon ktah ki yung, ki dukan, ki karkhana ya ka rymaw wei ye wow pynchitom ya kitu kiwa chna ya iwon iwon khlem da yoh bor chwa.
Ka High Court da dep wow phah lai pait yei rukom chna ya ka Moon View Café, Ri-Shat Sngi Orchid Resort, Ever Banalari Guest House & Hills Dafe deilang ya ka M/s Megha Automative LLP wa M/s Highland Toyota waka Rockland Motors LLP wa da leh da ka MSPCB ha ka 10 tarik uni u bnai deilang waka KHADC.
Wei neini chakhmat khamtam neibynta ki thaw kam ki karkhana, ki Hotel, ki Resort wa kiwi kam kini ki jait toh u pynrkhiñ bha ki kyndon. Wei ya kitu kiwa da yoh chwa u krehkaam hap lai pynyoo ka sorkar kammon u leh ki yow pyntikna wym chah ktah ka Umiam wa kiwa em chajan ko.
Heiyatoh wa ki thaw wa da phah pynsangeh yei chna, da phah ya ki pulit wow booddien yow pyntikna wym em kiwa lai chakhmat wow chna.
