U muktiar na ri-loom Jaiñtia, u Kynjaimon Amse da yaleh PIL u ha ka Meghalaya High Court pyrchah ya ka National Highway Authority of India (NHAI) hajrong i sih u sarok NH06 uwa da sih bha khamtam ha ki bynta ka Lumshnong waka Malidor ha East Jaiñtia Hills District.
Ka High Court hawa chong bichaar ya kani ka mukotduma ynnin ka sngi da ap ko yei pynsñiaw uwa yaleh mukotduma wa uni u sarok toh uwa pynyabi waka Assam wei da man u uwa sih bha khamtam hadien wa joor u slap ini wa dep heiwa da oor khyndaw ha kiwa boon ki thaw wei da sahkut i lai kari da boon boon sngi.
Da em leh i pynchna malu mala yow wai ya u sarok tangwa i pteiñ u slap da ktah ko yei ye u pynchna smat.
Kamtæ da phah ya ka NHAI wow khana ya iwa da pynkhreh yow pynchna ya waroh ki sarokbah wa lai luti napoh ka jylla neibhah ka aiom slap da jan kut ko wei katwon u chimpor wow leh yeini khamtam ha kini ki bynta wa da kdaw hapoh ka mukotduma.
Daw chong bichaar biang ya kani ka mukotduma ha ka 29 tarik uni u bnai.
