Ka High Court ka Meghalaya hawa pteiñ u chong bichaar ya ka mukotduma wa yatoh wa i tih mooyong pyrchah ya ka aiñ hapoh ka jylla da ong ko wa ini i kaam leh pyrchah aiñ toh em ki le bynta, i tih wa i kit ya u mooyong iwa ye u man wa da leh deiwa yarap ka sorkar hi wa i rukom dai ya u mooyong uwa da dep tih.
Ka yung bichaar da kdaw ko yei mih sa 13 lak MT u mooyong na uwa da dep tip chwa heiwa da em da ki boon hajar Ton u mooyong uwa da dep wow dai khlem da pynsangeh ka sorkar wot hadien wa da pynmih hukum ka NGT kamjooh ka Supreme Court kawa da khang leh yei rukom tih mooyong da i rukom yong rim namo ka Unscientific Mining.
Da ong leh wa ini da pynsakhiat deiwa em biang i mih khubor ha u bnai nyngkong uni u snem wa em 3 ngut kiwa yap hawa tih mooyong pyrchah ya ka aiñ wei da em leh ka FIR wa da e heiyatoh wa ini ha Ladrymbai Outpost iwa da jia ha ka 10-01-23.
Da kdaw leh wa da em 31 tylli ki Case kiwa da Register ha u Kmaichonglad (Dec) 2022 wa ha u Duyatra (Jan) 2023 tangwa ka sorkar ym em khana ko katwon u mooyong wa da chah kem.
Da kdaw chooh chooh yei poi biang ki mukotduma pyrchah yei tih mooyong pyrchah ya ka aiñ ha South Garo Hills wa ha Gasuapara kiwa da man kam i pyrdi ini i kaam pyrchah aiñ kamwa da maan ka thaaiñ Rymbai.
Ka yung bichaar da ong ko leh wa sñiawthooh hi yei dooh kreh ki bru nadooh wa khang yei tih mooyong wa man Unscientific tangwa toh i kaam ka sorkar wow wai da kiwi ki laad kreh ya ki paidbah heijooh i por leh toh i kaam ka sorkar wow khang ya ki kaam tih mooyong pyrchah ya ka aiñ.
Kamtæ da ong wa da pynmih boon ki hukum yow phah ya u Chief Secretary wa ki heh sorkar kamjooh da pynmih leh ya ka Contempt Notice pyrchah ya u SP ka East Jaiñtia Hills tangwa i tih wa i kit ya u mooyong pyrchah ya ka aiñ dang pteiñ hi i khlem em wa pynsangeh wei ye i wow joor chooh chooh ha kini ki por Election hanla kattu da lai chi snem i e por.
Hajrong ini waroh da ong wa da toh i por wow khut da ki Central Armed Police Forces yow pait wei wow pynsangeh ya kini ki kaam pyrchah aiñ wei da phah ya u Deputy-Solicitor General of India uwa da emlang hapoh ka kamra yung bichaar yow pait u ya ini neibynta ka sorkar India yow pyntip cha ka yung bichaar iwa emkaam u leh yow phah ya ki bru lada toh leh da ki Central Industrial Security Force lane ka Central Reserve Police Force (CRPF) yow chimkti noh ya ini i kaam wow sonteri ya ini i kaam wa yatoh wa i tih mooyong pyrchah ya ka aiñ wa kamjooh leh i kit pyrchah ya ka aiñ ya oo mooyong heithaw wow pait da ka jylla wei i lut i sep leh toh u bahkhlieh da ka sorkar jylla.
Heiyatoh wa u SP ka East Jaiñtia Hills da phah ya oo wow e daw ileh wym pynchitom ya oo kamjooh wym boi kset patok neidaw wym ye u wow pynsangeh ya ini i kaam pyrchah ya ka aiñ.
Ya ka mukotduma u chong bichaar biang ha ka 14 tarik uni u bnai.
