Heiyatoh waka mukotduma PIL wa yaleh da u Tennydard M. Marak hajrong i kit palat-pood ki kari kit mar neidaw wym pynkrehkaam hok ka sorkar ya ki kyndon aiñ wa pait yeini.
Neiliang ka High Court ka Meghalaya da ong ko wa deiwa pyrkhat yei man loom ki thaw ki bhaw ka jylla weiwa joor slap iwa da maad ka jylla, da man iwa emkaam wa ki kari wa kit mar u kit ki thij katkam ki kyndon wa da booh.
Kamtæ da ong wa ka sorkar jylla toh u chong pyrkhat biang ko hadooh katwon u chah u kit ki kari kit mar neibhah ki luti syngkieñ toh kiwa da sih chwa neidaw wa joor slap wei ym toh wow sih chooh chooh neidaw wa em ki kari wa kit palat-pood.
Ka sorkar hei jubab wa da e ong ko wa ym biang ki thaw wow thaw khia ya ki kari wa kit mar wa lai lyngba ka jylla wei wym em dap ki pulit ki wow ksoh ya ki kari wa kit palat-pood. Hajrong ini ka yung bichaar da ong ko wa toh u pynemkaam ya ki Weigh-Bridge kiwa da em chwa wei lada ye wow booh chooh chooh ki Weigh-Bridge hajan ki thaw psiah chapoh ka jylla wa ha kiwi ki thaw wa em cha pyrdi luti.
Da phah leh wow booh boon ki pulit ki wow pait yow pyntikna wa ki kari kit mar wa pynemkaam ya ki sarok ka jylla yow lai cha kiwi ki jylla da bood ki thij yei kydon kit mar katkam ka aiñ.
Da e por 3 bnai ya ka sorkar jylla wow khana iyi wa da leh yow pynkrehkaam ya ki kyndon aiñ wa da em chwa heiyatoh hadooh katwon wa ye u kit mar ki kari wa lai lyngba ka jylla.
Ya kani ka PIL daw chong bichaar biang ha ka 21-09-22.
