Ka mukotduma PIL wa da yaleh da ka Synjuk Waheh Chnong Jowai heiyatoh wa i jhep ha chnong Jowai, da chong bichaar biang ka haka 14 tarik uni u bnai heiwa ka sorkar da jubab ko deiwa pynyoo wa da yoh thaw yow chna ya ka Compost Plant wa pura wei u pyndep u chna ya kani hapoh 395 sngi.
Neiliang ka synjuk da pyntip ko cha ka yung bichaar wa i jhep da pteiñ i wow lang ha yung ki bru neidaw wym em wan kit jhep dei langær wei ini kynthup i yei jhep wa pyut wa kamjooh i jhep Plastic neibhah da wan kit ki du chisien chi tayaw.
Neiliang ka Jowai Municipal Board da jubab ko wa da leh yeini katkam wa da ya pynbait wa ki waheh chnong wei ym em ood kiwa chong chnong wei da em leh ka yasoi soskular wa ki bru samen yow pynlang yei jhep wei daw booh leh ya ki thaw noh jhep yow ye u lai thooh yei jhep chisien chi tayaw.
Tangwa neiliang ka High Court da ong ko wa heiyatoh wa i jhep wa pyut ym man wow kit du chisien chi tayaw tangwa toh u li kit man ka 3 sngi neibhah ini i jhep toh kiwa boon ki baam wa noh, ki soh wa kiwi kiwa daw sma wei ye leh wow wanrah yei kjut lada booh bait ki ha ki thaw sah ki bru.
Ka synjuk da e buit ko wa ka Dalmia Cement (Bharat) Limited wa em ha Lumshnong em ko i thaw wa thang yei jhep Plastic wei ka Municipal Board ye ko wow phah yei jhep Plastic wa da dep pynkhlaad cha kani ka karkhana heiwa kani ka karkhana da dep soi soskular ko leh waka Shillong Municipal Board wow leh yeini i jooh, kamtæ da phah ya ka Jowai Municipal Board wow leh ya ini i jooh.
Ya kani ka mukotduma u chong bichaar biang haka 31-01-23.
