Ka kyrwoh khubor naka laad pathai khubor ka sorkar India ka PIB, da pyntip wa 7 na ki 10 tylli ki District hapoh ka ri kiwa em boon dooh kiwa yoh COVID-19 (Positivity Rate) toh kiwa ha Maharashtra, iwa pynyoo wa uni u khñiang da joor bha poor u hapoh kani ka jylla wei emkaam leh wow pynkhlan yei leh Test.
Kini ki 7 tylli ki District toh ka Raigad, Thane, Nashik, Dhule, Pune, Jalgaon wa Satara. Ha Raigad kiwa yoh ya uni u khñiang na kiwa chah Test da em ki 31.7% iwa man iwa boon dooh, katwa ka Mumbai kawa em yaka Positivity Rate wa 19.7% ym em ko haka Top 10. Kiwi won ki District toh kiwa em ha Bihar.
Ki bru wa chem phang ha i chait i khiah da kheiñ ki yaka Positivity Rate kam kawa pynyoo hadooh katwon poor uni u khñiang.
Neiliang ka Bombay High Court da kylli ko yaka sorkar Maharashtra wa lada booh ko ki kyndon yow pyntikna wa ki thaw sumaar yong ki bru samen (Private Hospitals wa Nursing Homes) ym kheiñ dor ki deiwa sy’ad yaki tiar PPE wa kiwi ki tiar ha kam kini ki por wa em ka khlam COVID-19.
Neiliang ka sorkar Maharashtra da phah ko ya waroh ki District Collector wow pynchitom ki ya ki Hospital kiwa em hapoh ka Scheme Mahatma Jyotiba Phule Jan Arogya Yojana lada chem wa chim kabu ki wow pyn-sy’ad ya ka bai sumaar kiwa chitom na u COVID-19. Nalor wa pyndaiñ yaka kuna wa khia, ka sorkar da phah ko leh wow pyndam ka Registration kini ki jait Hospital kamjooh wow ujor pyrchah ya ki pyrchah wa ki pulit.
