U bru wa kreh mon sñiawbha na Ri-loom Garo, u Flaming B Marak da yaleh u da ka mukotduma PIL ha ka Meghalaya High Court hajrong i chah pyndooh bordiñ iwa cha palatpood.
Hawa chong bichaar ya kani ka PIL, da chah pyndooh bordiñ hapoh ka yung bichaar tangwa da wan smat biang ko heiwa kiwa bichaar da ong ki wa da toh por ya ka sorkar wow e jubab ko.
Ka sorkar neiliang u Chairman ka Meghalaya Energy Corporation Limited (MeECL) da pyntip u wa ha ka chi bnai emkaam 200 Million Unit ka bordiñ tangwa iwa em won toh du 88 Million Unit wei ka thaw pynmih bordiñ wa em ha Tripura leh da khang ya ka na ki daw wa hap pynchna ka, kamtæ ym chem thaw de ka sorkar wow thooh neiwon u yoh bordiñ.
Ka yung bichaar da ong ko wa toh i kaamram ka sorkar wow pynbiang bordiñ kamjooh wow pyrkhat ya ka mynstep ka mankawi wei ka sorkar toh u pyrkhat ko leh wow thied bordiñ na ka Open Grid wei wow ya soi soskular wa ki karkhana pynmih bordiñ kiwa em leh boon tylli hapoh ka thaaiñ North East yow pyntikna wa kiwa chong chnong ym chah ktah ki.
Da phah leh ya ka sorkar wow e jubab lyngba ki Affidavit yei pynkhreh ki kammon u leh neibynta kini ki sngi wow wan wei kamjooh leh ha ki snem wa daw wan.
Ka yung bichaar da pynkynmoo ko wa dang em ka mukotduma wa bichaar ko heiwa ka National Thermal Power Corporation Limited da kam ko wa em da ki spah klur tangka wa sah khlem su ka jylla kam chibynta ka soskular wa da soi yow pynemkaam bordiñ kawa da toh u su man-u-snem tangwa ym em won pynemkaam ya kani ka bordiñ.
Ya kani ka mukotduma u bichaar biang ha ka 30 tarik uni u bnai wei ha ini i por da phah ya ka sorkar wow pyntikna ko wa i por pyndooh bordiñ ymtoh u ktah ko ya ki thaw wa emkaam kam ki Hospital, ki Airport wa kiwi de.
