Heiyatoh wa iwa jia ha ka Public Hearing ka Meghalaya Cements Ltd (MCL) kawa da pynman ha ka 24 tarik u Naisaphra heiwa da chah dat chah bom ki paidbah wa wan pyrchah ha ki pulit, neiliang ka Meghalaya Human Rights Commission (MHRC) da phah ko ya u Director General of Police (DGP) wow pynman ya ka takit ya ini wa jia.
Yeini da phah hadien wa yoh ya ka ujor na u Joannes JTL Lamare wei ka MHRC da phah ko wow pyndep ya ka takit hapoh 15 sngi wei ya kani ka takit da toh wow leh da u heh pulit u wym toh u duna ya ka kyrdan wa man kam u Deputy Inspector General of Police.
Ka Commission da ong ko leh ini wa leh ki pulit toh iwa man pyrchah yei hok manbru wei kamjooh leh i hok wa da e hapoh ka riti synchaar ka ri wei kam ka imlang sahlang kawa da che ym ye wow pynchong nia ya ini wa da hap maad kini kiwa wan wow pyrchah.
Kam wow pynkynmoo ki pulit da sympat lathi, wei da tympdung ki da ki Tear Gas hadien wa wan da ki spah ngut ki paidbah wow pyrchah ya kani ka Public Hearing ka MCL wa da pynman ha Thangskai, East Jaiñtia Hills neibynta wow pynheh yei bor pynmih khyndaw-bilat kani ka karkhana.
Katkam ka ujor da ong wa ka riti synchaar ka ri da e hok ko ya kiwon kiwon wow pynyoo yei pyrchah deiwa booh kyndon.
Discussion about this post