Ka sorkar Meghalaya haka yalang ki Montri sorkar ynne da mynjur ko wow pha ya u Deputy Commissioner wow e ya ka bui (Report) wa bniah deilang wa ki Map yong kiwa boon ki thaw, neitæ ka tarik wa khaddooh kamjooh i dor i thaw yong ka sorkar kiwa da chah kyntoor pood ha Tura wa kiwi de ki thaw ka sorkar wa em ha West Garo Hills District.
U Montri Rangbah, u Conrad Sangma da ong u wa ini toh i kaam iwa da sahteiñ da slem wei da ktah ko yaka chnong Tura wei katni da rai ki wow chem laad kammon wow pynbait noh ya ini i kaam.
Ki Montri sorkar da yaklam ki yei dor i thaw heiyatoh waka West Garo Hills neidaw wa da em boon ki thaw ki yong ki chnat sorkar kiwa da chah kyntoor pood ha ki bru paidbah.
Da ong u leh wa ini i jooh da dep jia ha Williamnagar wei ka sorkar da ye ko wow pynbait yeini deilang wa ki paidbah deiwa e wai ya ini i thaw cha ki paidbah.
Kamtæ da ong u wa ha Tura leh da wan ini i jooh i tyrwa wei u DC da dep u wow sorjamin yeini wei da e u ya ka Report wei da paan bor u na ka sorkar wow lai chakhmat heiyatoh wa ini yow ye noh wow pynbait ya ini i kaam khlem da pynslem de.
U Conrad da ong u wa em boon ki thaw ha Tura khamtam ha Walbagre, Dakopgre wot hajan ka Civil Hospital kiwa da chah kyntoor pood tangwa neidaw won wa ki bru da sah ki ha kini ki thaw da slem da hap thooh laad kammon wow pynbait noh yeini.
Heijooh i por da ong u wa ini i chah kyntoor pood ka sorkar da ktah bha i manda emkaam thaw ka sorkar yow booh ya ki thaw sumaar, i thaw yow booh yaka yung krehkaam ka MPSC næ kiwon kiwon ki thaw wa emkaam ka sorkar wei kattu da emkaam wow pynbait noh ya ini waroh.
Discussion about this post