Jowai: U Lber Laloo uwa chong wa sah ha Panaliar, Jowai da yaleh mukotduma u haka Supreme Court pyrchah yei khang ka NGT yei khih mooyong hapoh ka jylla Meghalaya wei da chong bichaar ya ka ha kani ka 7 tarik kawa da yaleh u nadooh ka 25 tarik u January uni u snem.
Katkam ka mukotduma u Lber Laloo da pynchong yurim wa ka jylla Meghalya haap ko hapoh ka Sixth Schedule kamtæ ki aiñ ka sorkar pyrdi toh ym ye ki u krehkaam hapoh ka jylla kam ki aiñ wa yatoh wow tih ya ki mar pohkhyndaw. Wei ye leh u tih ya ki mar pohkhyndaw deiwa pyrkhat lang ya ka rymaw.
Ka Supreme Court haka 19 tarik u Thohlakhmi (February) hadien wa chong bichaar ko da phah kylli ko ya ka sorkar Meghalaya hei yatoh wa ini i kaam wei da jubab ko wa da pynkhreh ya ki Policy kawa dang yang yei mynjur ka Cabinet.
Ha ka 2 tarik u Naitung (April) won ka Supreme Court da kylli ko ya u Maninder Singh uwa man kam u Solicitor General ka India wow boodien u yeini i kaam yow sñiawthooh hadooh katwon sahkut kani ka kaam.
Ha ka 7 tarik uni u bnai won da chong bichaar biang ya kani ka mukotduma heiwa u Maninder Singh da ong u wa hapoh 4 tayaw daw e u ka bui (Report) wa khaddooh wei heijooh i por leh da ong u waka sorkar Meghalaya daw chim ko ya ka rai wa khaddooh hapoh ka le bnai.
U muktiar u Lber Laloo won da wanrah u ha khmat ka Supreme Court wa kani ka kaam da sah ko da boon snem ha ka NGT wei emkaam noh wow e ya ka rai smat neibhah ki paar mooyong kiwa ieh hi eh da booh ki yei maa ya ki um neidaw wa hadooh katni dang lai lyngba ka um na ki cha ki wah.
Kamtæ ka Supreme Court ha ka hukum wa pynmih ko da ong ko wa daw yang chwa ko chipor chwa wow e ka rai wa khaddooh wei da phah ko leh ya ka sorkar pyrdi wow chim ko ya ka rai heiyatoh wa kani ka kaam wei wow pyntip ko cha ka yungbichaar chwa wow chong bichaar biang
Discussion about this post