Ka Meghalaya Lokayukta hei bichaar ya ka mukotduma wa da yaleh da u Kingstone Bolwari Sangma pyrchah ya u Principal ka Tikrikilla College u Dipakor Mishra deilang wa kiwi 4 ngut kiwa ksohkaam ka College heiyatoh wym ye u e yukhieñ yei rukom pynlut ya ka poisa wa e yarap ka sorkar namo ka Grant-In-Aid kawa T. 1,70,99,000 kawa yoh kam ka Central Assistance neibynta u snem 2009-09 heiwa u Contractor leh da wiar u wei i kreh da sahkut i la 11 snem.
Uni u Contractor uwa tip kam u Tinker Marak (First Class Contractor) toh uwa da yoh wow kreh yei kaam ha ka 17-02-2010 wei toh u pyndep hapoh 3 snem heiwa uwa ujor da booddien u ya ini i kaam lyngba ka RTI heiwa da pynman leh ya ka takit hajrong ini da ki pulit heiwa da chem wa na ka T. 1,70,99,000 kawa da dep pynlait ha ki ar bhah, u Contractor da pynemkaam u du T. 36,01,732.
Da chem leh wa uni u Contractor da dam u wow kreh syndet syndet ha u Wisu (March), 2010 wei da wiar u ngeiñ wei wym chem de oo iwa da pynman ya ka sorkar wow pyndam ya ka Work Order.
Kamtæ u Director of Higher & Technical Education ka Meghalaya da phah u ki ya ki bor wa pynlai ka College wow pynmih poisa dei bor yong ki hi yow pyndep chna ya ka College. Neiliang ka College heiyatoh wa ini i kaam da e ki da ka FIR ha ka 21-03-11 ha ka Trikilla Police Station tangwa ka takit ym poi ko cheiwon cheiwon hadien wa u Investigating Officer da khlaad noh u.
Hadien wa lai pait won da u Assistant Executive Engineer, PWD (B), Tura Sub Division iwa da pyntip lyngba ka chithi wa em tarik 10-02-21, da pyntip cha u SDPO ka Raksamgre wa da chem wa i chna ya kani ka College Block da u Contractor u Tinker K. Makak da pyndep du ya ka mylla wa natre dooh wei i kreh iwa da dep man i du 25% iwa da man wa hadien 11 snem ini i kreh da neh i khlem pyndep.
Hajrong ini, u P.K. Musahary, Chairperson, Meghalaya Lokayukta da pynmih hukum u ha ka 18-03-21 yow phah ya u SP ka West Garo Hills, Tura wow pteiñ biang ya ka takit wei wow kem chi syndon ya u Contractor wei wow leh katkaam ka aiñ.
Da phah leh ya u DC ka West Garo Hills wow booddien u heiyatoh wa ka mukotduma heiyatoh wa ka poisa wa da yaleh da kiwa pynlai ka Tikrikilla College ha ka 07-06-2011 wei lada dang sahteiñ kani ka mukotduma wow leh yeiwa emkaam yow pynsmat katkam ka aiñ. Da phah leh ya u Secretary ka Governing Body ka Tikrikilla College lada emkaam wow e da ka mukotduma ha ka yung bichaar yow pynsmat u bichaar ya kani ka mukotduma wa yatoh wa poisa (Money Suit).
Kamtæ da e kti ya ini i kaam wow pyndep yei takit kamjooh wow lai chakhmat katkam ka aiñ ha kti yong kiwa takit ya ini i kaam namo ka Investigating Agency.
Neiliang uwa ujor ya ini i kaam wa ka Lokayukta, u Kingstone Bolwari da ujor won u ha u SP ka West Garo Hills wow kem ya u Tinker Marak uwa man kam u Contractor wa ya u Dipakor Mishra (Principal) wa sa kiwi ki 3 ngut katkam ka hukum wa pynmih da ka Lokayukta.
