U Chairperson ka Meghalaya Lokayukta da pynmih hukum u haka 25 tarik uni u bnai yow phah kem da kawa ye u yoh jamin (Bailable Warrant) kawa chongdor T. 20,000 wei yeini da phah wow leh lyngba u Superintendent of Police ka West Garo Hills.
Kini kiwa da phah chah kem toh kynthup ki ya ka Rikse R. Marak, ka Secretary warim ka Executive Committee ka GHADC kawa man katni kam ka Chief Executive Officer (CEO) ka Tura Municipal Board wa u Hewingson A. Sangma, Principal Secretary ka GHADC uwa dang dep chong ngiah ha uni u snem.
I daw wa phah chah kem toh neidaw kini ym jooh em wan mihkhmat ki ha ka mukotduma pyrchah ya ki wei da chah ujor ki ha u Flaming B. Marak wa 6 ngut kiwi kiwa jooh kreh ha GHADC kiwa katni da krehkaam paidbah heiwa da chah ujor leh pyrchah u Dipul R. Marak, CEM warim ka GHADC, u Benedic R. Marak, u CEM warim ka GHADC, u SG Esmatur Mominin, u MDC warim ka Shyamnagar GHADC Constituency, ka Twinkle Newar Sangma, ka Contractor kawa dang man chi boo chi kong wa u James Pangsang K. Sangma, uwa man kam u Montri sorkar wa u Conrad K. Sangma, u Montri Rangbah ka jylla.
Ka ujor toh neidaw wym em pynkrehkaam ya kiwa boon ki kreh wei i pynemkaam bakla ya ka poisa sorkar kamjooh wym em bood ya ki kyndon wa pynmih da ka sorkar pyrdi heiwa ki CEM warim ki MDC wa ki Contractor ym em u pynkrehkaam ki da ka klur tangka ka poisa heiwa da chah pynbaad baam tooh ya ka. Kamtæ ka yung bichaar ka Lokayukta da phah takit ko da u F.D. Sangma, Retired IPS uwa man leh u Director ka Inquiry Wing ka Meghalaya Lokayukta wei daw bichaar biang ha ka 29-06-22.
