Ka Mobile Internet deilang waka Broadband Internet daw khang ya ki chipor ha kiwa boon ki thaw ka jylla West Bengal yow yada na ki kaam pyrchah aiñ.
Katkam ka hukum wa da pynmih da ka sorkar jylla, daw khang ya ka Internet ha ki Block ka Malda, Murshidabad, Uttar Dinajpur, Coochbehar, Jalpaiguri, Birbhum wa ki Darjeeling District. Ka Internet u khang nadooh 11:00 waje i step hadooh 3:15 i sngi nadooh ka 7 hadooh 9 tarik uni u bnai, haka 11 wa 12 tarik wa haka 14 hadooh ka 16 tarik uni u bnai.
Ya ini da leh deiwa ong wa da yoh yutip wa daw pynemkaam ya ka Internet kamjooh deiwa Phone lyngba ka Internet yow leh ya ki kaam pyrchah aiñ.
Ka hukum sorkar ym em khang ko yei pynemkaam Voice Call wa ki SMS kamjooh ya ki kotkhubor deiwa ong wa kini toh kiwa emkaam hei wow e khubor.
Hanla kani ka hukum ym em ong che ko yei daw tangwa da suba toh yow khanglaad yei leh tooh heipor wa yaleh ya ka Board Exam ki Class-X ha West Bengal heiwa da dep mih khubor wa lait tooh ki thup yukylli (Question Papers) lyngba ki rynsan Social Media ha u snem 2019 wa 2020 chwa wow pynman Exam khamtam ha ka West Bengal Board of Secondary Education (WBBSE) kawa ym em pynman ynnin u snem neidaw wa em ka khlam COVID-19. Tangwa ka Board da kyntait ko yei lait tooh ki Question Papers.
Ha uni u snem ki tarik Exam toh ha u 7,8,9,11,12,14,15 wa haka 16 tarik uni u bnai wei kiwa daw yaleh da em ki 11 lak tam kiwa 6,21,931 ngut ki kynthai wa 4,96,890 ngut ki chynrang.
