Ka sorkar jylla da phah ko ya waroh ki Autonomous District Council wow khang noh chi syndon ya ki khyrdop khrong dan namo ki ‘Toll Gate’ kiwa em ha tymbud ki sarokbah yong ka jylla.
Ya ini i rai ka sorkar da chim ha ka yalang wa da pynman ynne ka sngi kawa da khut pynman da u Montri Rangbah, u Conrad K Sangma heiwa da emlang leh u CEM ka JHADC, u Executive Member ka GHADC, wa u Dy. CEM ka KHADC.
U Montri Kaam Pohyung wa pait leh ya ka District Council Affairs (DCA), u Lahkmen Rymbui da ong u wa ini ym toh wa ka sorkar tuklar ko yei hok ki District Council wow khrong dan ha ki thaw yong ki, tangwa wow booh ya ki khyrdop khrong dan ha tymbud ki sarokbah ym chah ka aiñ.
Da khana u wa lada em ki kyndon wa haap hapoh ki thaw yong ki ADC, daw hap ki wow wanrah yei e yumut kammon wa thmu ki u leh khnang wa ka sorkar u bichaar ko.
