Phah khet u Mawrie ha u Hek ya ka chithi e kaam ya u Hima wa u Kharkrang

Chi sngi hadien wa mih noh u MLA warim ka Mawsynram na ka BJP uwa man katni kam uwa e buit ka sorkar ha ka chnat puræ puthi, u Himalaya Muktan Shangpliang, da ong u wa u MLA ka BJP uwa man leh u Montri sorkar, u AL Hek da phla u wa u Ernest Mawrie uwa man kam u State President ka BJP da phah khet u ya ka chithi wa mut wow e cha u Montri Rangbah neibynta wow bhah kaam ya u MH Khrakrang wa ya u Hima hapoh ka sorkar.

U Hima da ong u wa hadien wa u Hek da pyntip u cha u Mawrie wow phah ya i pyrtuid ki ar ngut ki sahep warim wow embynta ha ki kaam wow yarap ya ka sorkar, neiliang u Mawrie da phah yang u wei hadien wa poi hei kamra krehkaam u Hek da phah khet u ya kani ka chithi deiwa ong kammon u phah ya i pyrtuid yong kini ki ar ngut kiwa dang psiah wot cha ka Party dang ynnin ynne.

Najrong ini da khana chooh chooh u wa u Mawrie da ong u ya u Hek wow phah da i pyrtuid yong oo hi kam u President ka Party heithaw u Hima wa u Kharkrang.

Ha iwi i liang u Hima da khana u wa i yoh yong oo ya i kaam kam uwa e buit ya ka sorkar ha ka chnat puræ puthi ymtoh neidaw ka BJP tangwa nei chynna jngai u Montri Rangbah wa u Symbood Montri Rangbah wa daw chimkti u ya ini i kaam.