U MDC ka Mawhati, u Charles Marngar da thoh u cha u CEM ka KHADC wow tuklar yei phah khyrrup u MLA ka Bathailangso Constituency, West Karbi Anglong ya ki Pipe Um ha ka chnong Ummat, Raid Nongtung kawa em hapoh Khyriem Syiemship, Ri-Bhoi District Block-II.
U Marngar da ong u wa uni u MLA uwa tip pyrtuid kam u Rupsing Teron deilang wa kiwa synran ya oo u Sona Terang, Deputy Secretary Karbi Anglong Autonomous Council, u ASI ka Ulukunchi u Eshaque Ali ha ka 5 tarik uni u bnai da phah khyrrup (Seize) noh ki ya ki Pipe Um ha ka chnong Ummar wa da pynkreh da ka sorkar Meghalaya neibynta ka Scheme Jal Jeevan Mission.
Ha ka chiti cha u CEM, u Marngar da ong u wa kani ka sorkar Assam toh kawa leh embor bha heiwa ka da pynkreh ko ya ki kaam pynroi man-ka-sngi katwa ki yong ka Meghalaya won da pynwit ko kut wa pyrchang wow pynkreh.
Da ong u leh wa ini toh iwa tyngkheiñ yeiwa da yakut ha kam kini ki thaw wa em ya kajia wa ye u wanrah ya ki kaam pynroi da waroh arliang. Wei ini i leh uni u MLA da pynyoo che yei leh embor ka Assam iwa da ktah ya ki paidbah kani ka thaaiñ.
Da kdaw u leh wa ini da pynyoo ko leh wa ka sorkar Meghalaya toh kawa chah jem wei kawa lehstiñ cha wa palat.
Kamtæ da kyrpaad u ya u CEM wow sñiawbha u wow tuklar deiwa ong wa ka Council ym toh u e laad ko yaka sorkar Assam wow leh katwa ngait neibhah kani ka thaw toh kawa dang em hapoh i pait ka KHADC.
