Ka Deputy Commissioner, East Khasi Hills da pynmih hukum ko ynnin ka sngi wow phah kyrriah ya kiwa chongdai madan kiwa da chim yei luti syngkieñ ki paidbah kamjooh kiwa pynthut yei lai i wan ki bru wa ki kari ha kiwa boon ki thaw ka Shillong kam ha thaaiñ Motphran, Police Bazaar, Polo, Civil Hospital, IGP Point, Barik Point, Laitumkhrah, Laban Last Stop, Rynjah, Nongmensong Point cha Wahkdait wa Madanrting Taxi Stand.
Ya kani ka hukum da pynmih hadien wa ka High Court ka Meghalaya da ong ko wa ym em yoosuk ko yei chim kiwa chongdai madan yei thaw ki paidbah nadooh ki luti ki syngkieñ heiyatoh waka mukotduma wa da leh da ka seiñ kiwa chongdai madan yow dawa pynkrehkaam ya ka aiñ ka sorkar pyrdi neibynta kiwa chongdai madan.
Ka High Court da ong ko leh wa ym ye u pynlai ryntih ya ki kari khlem da kyrriah ya kini kiwa chongdai.
Hajrong ini, u Chief Secretary ka jylla da phah u ya ka DC wow bood ko ya ini wa da phah ka yung bichaar neibhah i ujor da yoh leh na ki paidbah wa kat dang mih ki sngi dang boon kiwa chongdai ha rood sarok iwa da pynthut yei lai i wan ki bru kamjooh ki kari khamtam kiwa da heh rta wa ki khynnah skur.
Chooh chooh da em leh wa da chah tyrrah ha ka Bus neidaw wa hap ki wow lai na sarok wym em thaw de na luti lai kjat wa da chim lut kiwa chongdai ki. Da em leh ka ujor na kiwa duna hei doh i pran wa ki leh em ki yei hok wow lai deiwa laitlooid.
Ka DC da ong ko leh kiwa dai baam ha rood sarok toh kiwa dai khlem da bood kyndon heiyatoh wa i khooid i jngiar heiwa da pynemkaam ya ki nardiñ, ki kharai pyn harood sarok wei em leh kiwa da chongdai deiwa kyruiñ dei dien cha u sarok iwa da booh hei maa ya ki kamjooh ki paidbah wei ini da man ko leh pyrchah ya ka aiñ Motor Vehicle Act, 1988 wym chah u pynthut yei lai i wan ki kari kamjooh ka aiñ Meghalaya Police Act & Control of National Highway (Land & Traffic) Act, 2002.
Kamtæ ka DC da ong ko wa dadep wow pynman ya kiwa boon ki yalang wa kiwa boon wa emkti ha ini wei da phah yow pynsuk yei lai i wan wa i khooid i suba deiwa phah kyrriah ya waroh kiwa chongdai rood sarok wow kyrriah ki na ki thaw wa da kdaw haneiñ.
Ki Committee wa da khlieh da ki Magistrate wa daw emlang leh ki pulit wa ki heh ka Shillong Municipal Board, PWD (Roads) wa kiwi de daw pyntikna wa da pynkrehkaam ya kani ka hukum hapoh 10 sngi deiwa pynbait yei thaw chongdai lane wow e thaw cha kiwi ki thaw kamjooh kiwa dai marbaam wow bood ki ya ka kyndon wow lehkhooid.
