Shillong: Ki khynnah puræ ka Kalpataru Academy da sah ki hei langoh hadien wa ka thaw puræ wa suba toh kawa thok neidaw wym yoh ko ya ki kot ki sla wa tipmit ya ka na ka Board of Higher Secondary School Education (BHSSE) Delhi, hadien wa wan wai tnat ko hapoh jylla.
Kini ki khynnah da chem ki yei eh i khoo hadien wa yaleh ki ya ka exam SSLC næ class X, wei kani ka thaw da phah yaleh biang ko ya kani ka jooh hi ka exam.
Kini ki khynnah hadien wa yachem ki ya u Principal kani ka thaw puræ, u Debashish Chakraborty ynne ka sngi da pynsñiaw ki yei mynsien wa chrai hadien wa phah biang u wow yaleh ya kani ka jooh ka exam (SSLC) wei katni dang puræ ki ya ka class XII.
“I da pyndep i ya ka Class X wei katni da mut i wow yaleh Class XII tangwa neiliang kiwa pynlai ya ka Kalpataru Academy da ong ki hap yaleh biang ya ka matric, tangwa i ym kwah i u leh ya i tæ, i kawah i wow pyndep ya ka Class XII kam i hok yong i,” da ong kawi kawa puræ ha ini i thaw.
Da ong wa ki khynnah puræ kani ka skur kiwa em kamwa 200 ngut ymtip ki wa kani ka skur toh kawa thok.
“I kwah i wow yoh yei bichaar wa hok wei ki thaw hikai ym pdiang ki ya i manda lai thoh admission i” da ong ki khynnah kani ka skur.
Hei sakhiat ka tnat puræ puthi ka jylla da tipmit ko ya kani ka skur wa tip kam ka Kalpataru Academy ha u Naisaphra 2015 wei hadien wa chem wa man kani ka skur kawa thok wei ka wym tipmit ka Board of Higher Secondary Education (BHSE) Delhi wa na ka tnat School Education & Literacy, ka tnat Human Resources Development, ka tnat puræ puthi ka Meghalaya da pyndam ki yei tipmit ya ka ha ka 8 Naiynru (June) 2016.
Ha iwi i liang, u Principal kani ka skur u Debashish Chakraborty da pynksan u wa kani ka thaw puræ ymtoh kawa thok neibhah da tipmit yaka da ka sorkar Meghalaya wei da pynman yaka kam ka thaw esikai ka NIOS, MBOSE wa kiwi kiwi.
U Chakraborty da ong u leh wa daw lai yachem u wa ki muktiar hei yatoh wa ini wow pyntikna wa ki khynnah ym sñiawthooh bakla ki.
Discussion about this post