Shillong : Katkam ka yutip wa da yoh da ong wa kawi ka khynnah kawa hapoh 18 snem rta kawa na Tripura da ujor ko ha ki pulit ka Madanryting Police Sardar, Shillong.
Kani ka khynnah da kynnoh ko wa ka tre yung heiwa sah chong kreh ko kawa tip kam ka Mamoni Parvin kawa sah ha Demthring, Shillong da yah ko ya ka cha ki yung ki chynrang kiwa da chim kabu ya ka (Sexual Exploitation) la chi snem nadooh wa sah ko wa ka.
Do ong kani ka khynnah ha ka FIR wa lada leh pyrchah ko yeini da chah dat chah bom ko wei da chah maham ko ha ka Mamoni.
Ka Mamoni jooh li yah ko ya kani ka khynnah cha ki Guest House wa ki Hotel kiwa em chynrang, wei da li thooh ko ya ka ha ka sngi wa bood.
Kani ka khynnah da ong ko leh wa ha ki sngi wa da dep kani ka bru da yah ko ka cha ka Guest House ar sien wa tip kam ka Marvelene’s Inn kawa em ha Rilbong, Shillong.
Ki pulit da kem ki ya ka Mamoni wa ka wi ka wa kreh ha kani ka Guest House kawa tip pyrtuid kam ka Usha Devbarman.
Hapoh kani ka Guest House da em ki CCTV tangwa nadooh ka 28 tarik u Khonchonglad ym em de krehkaam ki wei haka 15 tarik uni u bnai da wanrah ya kani ka khynnah cha kani ka Guest House.
Ki pulit da kem ki ya ka Mamoni wa ka Usha wei da pynngat ya ki hapoh ka kyndon Section 5 yong ka Immoral Traffick (Prevention) Act 1956 wei u kset ya ki 5 sngi.
Hadooh wa pynmih ya kani ka khubor ka Mamoni da ong ko wym chait ko wei ki pulit da kit ki ya ka cha Shillong Civil Hospital.
Discussion about this post