Khliehriat: Ka seiñ Southern Border Youth Welfare Association (SBYWA), East Jaiñtia Hills District hei yahkhmat u Skhembor Shadap, President wa u Namphrangmi Talang, General Secretary ka Association deilang wa ki dkhot kam u I. Rymbai, u S. Biam da lai booh ki ya i marbaam ya kitu ki manyung wa dooh wa duk yong ka chnong Huroi deiwa phah da u khoo, phniangbaam wa u dai ynne ka 3 tarik.
Ya kini ki marbaam ka Association da hap phah kit lyngba ki lieñ yong ka chnong kam ka Kuliang wow pynpoi won cha chiliang ka chnong Borsara khnang wow yoh thap ha ka kari yong ka chnong Huroi neidaw wa sih u surok da booh ko hei eh wow lai cha kitai ki chnong lyngba u sarok Rymbai-Bataw-Borghat-Sonapur uwa dang sahteiñ khlem pynchna hadooh katni.
Neiliang u S. Shadap, da ong u hanlada kiwa chong chnong chem ki chiboon i eh i khoo khamtam hajrong i chah ieh beiñ ki luti ki syngkieñ, ki thaw sumaar, ka Mobile Network, bordiñ wa kiwi ki kaam pynroi tangwa neiliang yong ka Association ym em ieh ko ya ki wei u emlang la heiwon heiwon i por.
Ya kini ki maarbaam ka Association da chaniah wei da ekti ko ha kiwa yahkhmat yong ka chnong Huroi wow saam cha kiwa toh sap u yoh myntoi.
