Ki dkhot ka Federation of Khasi Jaiñtia and Garo People (FKJGP) ynne ka sngi da lai ki cha kamra yong u Director ka chnat Directorate of Printing and Stationery, u Salgira R Marak ha Shillong yow phah ya oo wa toh u mih noh u na ka yung krehkaam hajrong i pynbaad wa pynemkaam bakla ya ka poisa kawa da poi hadooh palat T. 2 klur.
Ini i lai yong ki dkhot ka FKJGP ha kamra u Director toh hadien wa ka seiñ da dep wow phah da ka chithi cha u Montri Rangbah ka jylla wow dawa pyndam kreh noh ya u Marak hapoh 10 sngi.
Uwa yahkhmat ka FKJGP, u Reginald Thabah da ong u wa ini i dawa pyndam kreh ya uni u Director toh hadien wa chem da ka RTI wa da paan da u Egenstar Kurkalang, kawa da pynyoo wa uni u sahep da pynemkaam bakla ya ka poisa kawa dapoi palat T. 2 klur.
Uwa yahkhmat ka FKJGP da ong u wa i lai yong ka seiñ wow phah mih ya utai u sahep na ka thaw krehkaam toh hadien wa ka sorkar ym em pyndam kreh ko ya uni u Director wot hadien wa ka seiñ da e por ko hadooh 10 sngi.
U Reginald da ong u wa ka sorkar toh u ap ko yei dawa neibha wa uni u Director da pynemkaam bakla u hadooh T. 2 klur katkam wa yoh jubab da ka RTI.
Neiliang u Director ka chnat Directorate of Printing and Stationery da ong u wa ini ym toh du iwa pynbaad tangwa iwa da yahbakla wei da pynsih leh yei pyrtuid yong oo wei kini ki pynbaad toh ki wym em yurim.
U Salgira R Marak da ong u wa hei krehkaam ym ye wow kiar yei pynlut pynsep wei ka Enquiry Committee toh kawa dang chong takit ya ini i kaam tangwa ynne ka sngi neidaw wym ye u kiar kamtæ hap wow kyrriah noh cha kawi won ka sngi.
