U Phon Lyngdoh deilang wa ki soo tylli ki Seiñ Raij Chnong wa em hapoh ka Elaka Rymbai da yaleh mukotduma ki ha ka Meghalaya High Court pyrchah yei khut ka JHADC wow pynman Election Dolloi ka Elaka Rymbai ha ka 24 tarik uni u bnai heiwa ka yung bichaar da pynmih hukum ko wow pynsangeh chwa wow pynman ya kani ka Election.
Ka JHADC hawa pynbna ya ki kyndon yaleh Election da ong donhi ko ya ki kur kiwa emhok wow yaleh ya kani ka Election tangwa ym em kdaw ko toh u man ki na kawon ka niam heiwa ha kani ka kynti da em le ngut kiwa daw yaleh ya kani ka Election jied Dolloi.
Neiliang u muktiar ka JHADC da ong u wa nachwa da em kiwa man Dolloi kiwa man leh kiwa bood ya ka niam Christan kam u Ri Swer uwa da chah jied ha ka 27-02-1975, u Batskhem Lyngdoh ha ka 25-05-1993 wa u Elious Swer ha ka 20-08-2014, kamtæ da ong wa ka hukum wa da pynmih ha ka 19-04-23 da ka JHADC yow jied Dolloi ym em iwa duna ha ka.
Neiliang won u muktiar kiwa yaleh mukotduma da ong u wa i kaam u Dolloi hapoh ka Rymbai Elaka toh em ki ar jait, iwi toh ka synchaar khadar wei kawi won toh wow pyndep ya ki kaam niam heiwa da e nongmuna wa ha u snem 2015 u Dolloi neidaw wa man u kam u Christan ym bien u wow pyndep ya kini ki kaam niam wei da phah hi-eh u da kiwi ki bru heithaw yong oo iwa da pynchrai ya ki paidbah neibhah ya ki kaam niam toh u pyndep da u Dolloi.
Yow pynksan chooh chooh yeini da ong wa ka District Council ym em pyrkhat bha ko chwa wow pynmih ya ka hukum pynman Election deiwa e nongmuna ya ka hukum wa da pynmih da ka Supreme Court heiyatoh wa ka mukotduma u Ewanlangki E Rymbai pyrchah ya ka JHADC heiyatoh waka Elaka Jowai wei da ong u wa heitu i por da pynmih ya ka hukum wa ong wa du kiwa man niamtre kiwa ye yaleh Dolloi wei ini ym em man ko kawa lehbakla neibhah u Dolloi i kaam u toh ka synchaar khadar deilang wa ki kaam niam tangwa ym ye wow leh ya kini da u Christan wei ini i rukom kheiñ da ka niam katkam ka hukum ka Supreme Court ym em ktah ko ya ka Article 14, 15,16 wa ka kyndon 244(2) ka 6th Schedule.
Kamtæ da ong wa ka hukum ka District Council ym em pyrkhat ko ya kini ki kaamram u Dolloi wei lada lai chakhmat daw wanrah yei thut i chongsuk.
Hajrong ini ka yung bichaar da ong ko wa neidaw wym em kdaw ka hukum ka District Council ya ki kyndon wa emkaam yow ye u yaleh Election Dolloi wei ki seiñ niamtre leh da pynsñiaw ki yei pyrchah ya kani ka hukum ka District Council wym em pyrkhat ya ki kaamram niam kamtæ da sñiaw biang wow bichaar ya kani ka mukotduma.
Chooh chooh da ong wa hanla ka aiñ Jaintia Hill Autonomous District (Establishment of Elaka and Village and Election, Appointment, Powers, Functions and Jurisdiction of Dolloi/Sirdar and Waheh Shnong) Act, 2015 da klam che ko kiwon ki kur wa ye u yaleh ya ka Election Dolloi ka Rymbai Elaka tangwa ka District Council won kam kawa toh u pait ya ka dustur ka riti toh u klam che ko wa lada du ki bru na ki kur wa da tipmit wei kiwa man na kawon ka jiat niam kiwa hoi wow ksoh yei kyrdan Dolloi.
Kamtæ ka High Court da ong ko wa emkaam u yoh yei pynche hajrong ini neibhah lada lai chakhmat ya ka Election ye ko wow em i ktah wa jngai bha, deiwa pyrkhat yeini da pynmih ya ka hukum wow pynsangeh chwa ya kani ka Election Dolloi hapoh ka Elaka Rymbai.
Neidaw won wa u Acting Dolloi wa katni leh yaleh u ya kani ka Election, da phah wow thung sahep wow pait ya ki kaam ka Elaka.
Ya kani ka mukotduma u chong bichaar biang ha ka 27-06-23.
