Ka JSU Khliehriat Circle ynne ka sngi da hiar ko cha Mynkre yow pait dei khmat ya ka thaw tylliat moo ka G.R. Infra Project kawa kreh hapoh ka NHAI wei ka seiñ da chem ko wa ka karkhana tylliat moo ha kani ka thaw man ko kawa jakhlia wei kawa pynmih kulmar yei tdem wa ki pui pui kiwa ye u ktah yei chait i khiah yong kiwa chong chnong kiwa em haka chnong kiwa marjan.
Kani ka karkhana toh kawa em ha ka chnong Mynkre, East Jaiñtia Hills District.
Kiwa yahkhamt ka seiñ JSU Khliehriat kiwa kynthup ya u President u Livingson Sama wa u Vice President u Laski Siangshai deilang wa ki dkhot ka seiñ da yoh ki wow yaklam wa uwa pait ya kani ka karkhana wei ka seiñ da phah khang chwa ko chipor hadooh wa ka Company da yoh ko wow booh da ki Filter kiwa biang wei wow booh toskhana uwa jrong wa pynmih tdem lait wow chah ktah ki paidbah wa kiwa chong chnong.
Neiliang u President ka seiñ da ong u wa ka seiñ daw booddien ko hadooh wa ka karkhana pynbiang ko yei emkaam yow lait nei chah ktah ki paidbah wa kiwa chong chnong nei tdem wa mih na kani ka karkhana tylliat moo.
