Jowai: Ka National Border Construction Company (NBCC) da sdang biang ko wow pteiñ ya i kær pood ha Huroi kawa em khapood wa ka ri Bangladesh. Ini toh hadien ki kajiak bnai wa da dep wa ka KSU Narpuh Circle deilang wa ki tre thaw da lai pynsangeh ki ya i kær sainar neidaw wa ka Company ym su ko yaka bai lutsan (Compensation) cha ki tre thaw kiwa chah ktah na ini i kær pood.
Hadien ini, u DC ka EJHD da phah khut u ya ki tre thaw wow wan mih cha yung krehkaam yong oo. Ha i yachem, neiliang u DC da ong u wa ka NBCC ka da dep su ko ya ka bai lutsan waroh, kamtæ ym ye de wow su biang ar sien yaka jooh ka thaw. Tangwa neiliang ki tre thaw da pynsñiaw ki yei phylla neidaw wa ki ym em yoh ki chi anna leh. Katwa u DC da ong u wa ki tre thaw ym em hok ki wow pynsangeh ya i kær pood wei lada leh ki ya ini daw phah da ki chipai yow leh da iwa eh. Tangwa neiliang ki tre thaw da ong ki wa u pteiñ ki u pyrchah katwa ym pu yoh ya ka hok.
Kamtæ, ki tre thaw wa ka KSU Huroi Unit ynnin ka sngi ka 30 tarik da yoo ki wa ka Company da sdang biang ko wow pynkrehkaam, wei da lai ki wow pynsangeh ya i pynkreh. Ki tre thaw da ong ki wa da ngiah ki wow lai mih chi mih cha yung krehkaam u DC wow kyrpaad ya jooh chi jooh, wa daw chah thok biang ki. Da ong ki leh wa u DC toh u pyntip u ha ki wa chei yi wa da dep su yaka bai lutsan (Compensation) yow che kiyi wa chim yaka poisa, wei ini i leh yong ki toh wow dawa yei hok yong ki.
Ini toh katkam ka kyrwoh na u Poly Pohlong, Vice President KSU Huroi Unit.
Discussion about this post