U Symbood Montri Rangbah ka jylla uwa pait ya ka Kaam Pohyung (Police), u Prestone Tynsong da ong u wa ka sorkar jylla daw chong bichaar ko hajrong ka aiñ wow pait yei psiah kiwa na baar hadien wa ka Ministry of Home Affairs da pynuiñ ko ya ka Meghalaya Residents Safety and Security (Amendment) Bill, 2019 dang ini wa dep.
Hawa klam ynne ka sngi, u Prestone da ong u wa ha ka tayaaw wow wan daw em ka ya pyrkhat biang hajrong kani ka aiñ wa da mynjur da ka yung dorbar chna aiñ yong ka jylla, heiwa daw ya phyllu yumut lang wa u Montri Rangbah, u Conrad K Sangma wa ki kattu katni ki sahep sorkar ryngkat u Advocate General ka jylla.
Hajrong i pynkrehkaam ya ka Meghalaya Residents (Safety and Security) Act, 2016 ha ki kattu katni ki dong ha Shillong, u Prestone da ong u wa ini i pynkrehkaam ya ka MRSSA ymtoh wa dang pynkrehkaam dang heini, tangwa neiliang ka sorkar da thung ko leh ya ka District Task Force wa da khlieh da ki Deputy Commissioner wa ki Superintendent of Police yong ki District kam ki dkhot ka Task Force wei lyngba ki Task Force da phah wow pynkrehkaam ya ka MRSSA ha ki District.
Hawa yatoh wa ka khyrdop (Entry/Exit Point), neiliang u Prestone da ong u wa ini leh daw hap wow yaklam biang ha ka tayaaw wow wan neibhah wa haap ko ha ka MRSS Amendment Bill.
Discussion about this post