Jowai: Ki Waheh Chnong na ki 10 tylli ki chnong na ka thaaiñ Saphai Iooksi, Laskeiñ C&RD Block ynnin ka sngi da lai yachem ki ya u Executive Engineer ka MeECL, Jowai.
Kini ki waheh chnong ha kani ka 30 tarik da pynsangeh ki wow su ya ka bai bordiñ ha ki chnong yong ki neidaw wa ka bai bordiñ ym man ko kawa bait.
Neiliang ki waheh chnong da dawa ki na uni u sahep wow phah pynbait ya ka bai bordiñ ki paidbah ha ki chnong hapoh 7 sngi namo chwa ka 10 tarik uni u bnai.
Heijooh i por da dawa leh wow pynche ha kiwa kitkaam chnong yei rukom kheiñ ya ka bai bordiñ khnang wow pynsuk ya ki paidbah.
Kini ki waheh chnong toh yong ka Saphai, Iawthymme, Iooksi, Iapkhla Priang, Iooksikyanmynsar, Umdienglieng, Tongkiad, Lakadong, Khonchnong wa Nongryngkoh.
Hadien ini i yachem neiliang u sahep ka MeECL da kular u wow pynbait wei wow chimkhia yeini.
