U Director of Health Services (MI) ka jylla Meghalaya u Dr. A. War da pyntip u ynne ka sngi wa ka chnat i chait i khiah duna ko ya ki Doctor wei neiliang ka Directorate ynne ka sngi da kyntu ko ya waroh kitu ki Doctor kiwa lai puræ daka Quota ka sorkar kiwa tip leh kam ki Bonded MBBS Doctor wow wan ki cha ka Directorate chwa wow kut uni u bnai.
Kini ki Doctor katkam wa pyntip u DHS da em ki kamwa 50 ngut wei em na ki kiwa kreh ha ki Hospital ki bru samen wa em ha ka jylla wei lada ym wan ki chakhmat chwa wow kut uni u bnai, neiliang yong ka Directorate daw pynmih ko ya ki pyrtuid yong ki wei daw hap ki leh wow su yaka Bond kawa man T. 10 lak hadooh T.25 lak.
“Ka sorkar da phah ko boon ngut ki Doctor wow lai puræ MBBS wei da soi ki leh yaka soskular (Bond) waka sorkar, wei man ko i kaam yong ki wow wan chakhmat, wei lada em ki hapoh ka jylla ym toh wow kreh ki wa kiwi ki Hospital wei lada ym leh ki ya ini daw phah yaka Notice cha ki yow su biang ki yaka Bond,” da ong u DHS.
Da ong chooh chooh u wa hadien wa kut uni u bnai lada ym wan ki cha ka Directorate, nadooh wa sdang u Naikhynde daw sdang pynmih yei pyrtuid yong ki wei lada ym sñiawhun ki wow kreh waka sorkar daw hap ki wow su noh yaka Bond.
Da pynkynmoo u wa ka sorkar da yarap ko ya ki wow lai puræ, wei da jied ya ki neidaw wa poi ki chakhmat haka puræ puthi wei na ini i daw toh u wan ki wow kreh waka sorkar.
