U Lamphang ka Meghalaya Legislative Assembly, u Thomas A Sangma, ynnin da lai pait u yei chna yaka Assembly Building wa thymme ha Mawdiangdiang.
Ha kani ka sngi da emlang leh wa u Montri Rangbah, u Conrad Sangma, ki Symbood Montri Rangbah, u Prestone Tynsong wa u Sniawbhalang Dhar, u Montri ka chnat Bordiñ, u AT Mondal, u Montri ka PHE, u Marcuise N Marak neitæ u Contractor wa kiwi kiwi de ki sahep sorkar na kiwa boon ki chnat.
Hadien wa lai pait, neiliang u Lamphang da pynsñiaw u yei kmen yei lai i kreh chakhmat wei da ban joor u wa toh u pyndep u chna hapoh uni u snem wei da yooluti u wow pynman yaka dorbar ha kani ka yung thymme hapoh i por wa da booh.
Heijooh i por da ong u wa emkaam u man ka yung kawa chna dei miat deiwa skem yow lait na iwon iwon i jia wa sñiawsih.
Da ong u leh wa hanla emkaam wow pyndep u chna heipor, ymtoh won u leh jhan tangwa wow kreh khlem da leh khalær wei wow bood ya ki kyndon.
Neiliang u Montri Rangbah kamjooh ki Symbood Montri Rangbah da pynsñiaw ki leh yei kmen yei rukom lai i kreh.
U Lamphang da khana u leh wa ki tiar ki taar yow chna yei tnoom kyllung toh kiwa da dep thied, kamtæ da kyrmen u wow lai bait i kreh.
Discussion about this post