Ka San Shnong Fishing Association (SSFA), wa kynthup yaka chnong Mynsang, Mawdulop, Mawsir, Ksanrngi (EKH) wa ya ka Sohmynting (WJH) da maham ko wow e kti cha ka aiñ yaki bru wa leh pynsih yaki dohum hapoh ka wah Umngot lada wym wan hajir ki cha ka seiñ hapoh ar le sngi.
Kamwa man katte ka seiñ da khut hajir ko ya u Bai Suting uwa naka chnong Mynsang deiwa ong wa uni u bru toh uwa da emkti boonsien wow leh pynsih yaki dohum hapoh ka wah Umngot, wei dang haka 22-01-2022 da yoh u wow yut na kti ki Volunteer wei da yoh kem du yei kiad wa rah u charood um.
Neitæ u Khleiñ Myrboh naka chnong Mawdulop, ya uni leh ka seiñ da yoh yutip ko wa emkti u wow pakhot jaar.
Neiliang u Welcome Langi, General Secretary ka San Shnong Fishing Association, ong u kamwa da sdang ya kani ka seiñ hajrong ka yurim u yada yaka wah Umngot kamjooh ki dohum wa em haka, na ini i daw da khang pyrchah leh u pakhot bom, pakhot jaar næ wow leh kiwon kiwon ki kaam wa man pyrchah ha kani ka wah.
Da pyntip u leh wa ini i kiad wada yoh kem toh iwa dai hapoh u pood u ang ka San Shnong Fishing Association, wei i kiad man ko leh chibynta u pynchlur yow leh pynsih ha ki um ki wah.
Neiliang kiwa yahkhmat ka Association deilang wa ki dkhot wa kynthup u Chai Pyrtuh, u Kroi Pohleng, u Embok Ryngkhlem, u T. Ryngkhlem, u Pheiñ Phawa wa kiwi da yang ki ya u Bai Suting wow wan hajir u hakhmat ka seiñ ha chnong Sohmynting ynne ka sngi kamwa da phah dei thoh cha oo, kamtæ neidaw wym em wan u, da e por ya oo kamjooh ya u Khleiñ Myrboh i wan mih ki cha ka seiñ hapoh le sngi, lym kamtæ daw leh yeiwa emkaam.
Heijooh i por ka seiñ kyntu haroh ko ya ki paidbah kamjooh ki bor sorkar wow yakrehlang neibynta i bha i miat ka wah kamjooh ki dohum.
