Phah wan ka High Court dei bru ya u SP ka East Jaiñtia yow pynche yei pteiñ i tih mooyong

Ka mukotduma PIL wa yaleh hi da ka High Court ka Meghalaya heiyatoh wa i tih mooyong pyrchah yaka aiñ da chong bichaar biang ka ynne ka sngi deiwa wanrah yaka 18^th Interim Report wa da thoh da u Justice B.P. Katakey (Retd) yeiwa chem u ini wa dep heipor wa lai u cha East Jaiñtia Hills heiwa da chem ya chiboon u mooyong wa dang tih thymme wa em hajan ka Don Bosco College ha Byndihati wei hajan ka Weigh Bridge kawa dang chna kawa em hadien kani hi ka College.

Kani ka Report da ong ko leh wa da chem ya ki krem mooyong pyn hajan ini i thaw wei uni u mooyong ymtoh uwa da dep chim yukheiñ iwa pynyoo wa i tih mooyong pyrchah yaka aiñ dang pteiñ hi i wei da chem leh ya ki dak ki chaka kari wa pynyoo wa dang dep wan pynhaap mooyong wei kamjooh i kit ya u mooyong pyrchah ya ka aiñ.

Ka High Court da ong ko ki dur ki dar wa da e lang hapoh kani ka Report pynyoo ko wa ye u em i tih mooyong pyrchah yaka aiñ wei da dep phah leh ya u DC wow e Report u hapoh chi tayaaw kammon kini ki kaam pyrchah aiñ dang ye ki wow pteiñ.

Neiliang ka sorkar da e FIR ko ha ka Khliehriat Police Station wei ki bru ka Directorate of Mineral Resources (DMR), Umkiang Check-Gate da lai chim yukheiñ ki wa uni u mooyong wei toh uwa khia 4900.20 MT wei da pyntip ki wa uni u kool toh u yong u Mul Sympli (NGT Serial No. 1049, co-ordinates N 25.3249, E 92.373775), wei uni u mooyong toh uwa da dep chim yukheiñ da u Magistrate ha u 2019 wei khia u 4800 MT wei hadien wa lai chim yukheiñ haka 25-08-23 toh uwa khia 4790 MT, kamtæ da ong wa uni u mooyong ymtoh uwa da dang dep tih pyrchah yaka aiñ.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Tangwa ka yung bichaar da ong ko wa katkam wa pyntip u Investigating Officer cha u DC ka East Jaiñtia Hills District kawa da e haka 21-11-23 (Annexure-B kam chibynta ka Status Report), ki Co-ordinates kani ka thaw wa em u mooyong katkam ka FIR toh Latitude 25.3326445 wa Longitude 92.3734301 i wym yatoh waka Coordinate wa u mooyong  yong u Mul Sympli.

Kamtæ ka yung bichaar da ong ko wa ini waroh deilang waka 18^th Interim Report toh iwa khyrngiat bha wei pynyoo leh wa em hi i tih mooyong pyrchah aiñ iwa heh bha wei da leh deiwa khlem em wa khanglaad hanla em ki hukum ka Supreme Court, ka NGT deilang waka High Court. Wei yeini da chem leh pyn hajan ka Don Bosco College iwa pynyoo yei wym em leh kitu kiwa toh u leh yei kaam yong ki khamtam ki heh pulit wei u SP hap wan pynche u yeini.

Kamtæ da phah wan ya u SP dei bru hapoh ka yung bichaar haka 11 tarik uni u bnai heipor 10:30 yow pynche u.