Shillong: Ka tnat Legal Metreology da pynbna ko yei eh wa chem ko hei wow pynemkaam ya ka kari kawa tip leh kam ka Testing Kit neidaw wa heh wei khia ware ko.
Kani ka kari khia ko hadooh kamwa 30 Tonne wei i kaam yong ka toh wow thaw khia ya ki mar wa pynmih na ki karkhana wa em ha ri-loom Khasi Jaiñtia.
Neini i daw ka tnat da thoh ko cha ka sorkar pyrdi wow chim noh ko ya kani ka kari neidaw wym ye u pynemkaam ya ka wei da booh hi-eh ya ka ha pchem ka yungkrehkaam u DTO, EKH, Shillong.
Neiliang u Director kani ka tnat u Israel W. Ingty da ong u wa ka sorkar India da e ko ya kani ka kari ha u snem 2010 wow thaw khia ya ki mar wa mih na ki karkhana tangwa da man ko u moochynthut neibhah wow lai na Shillong cha Jowai da chimpor ko kamwa 6 kynta wei daw lut kamwa T. 6,000 chisien lai.
Da ong u leh wa ka sorkar pyrdi da e ko le tylli ki kari khian kiwa khia 16 tonne kawi yow leh ya ka Mobile Testing Kit.
U Ingty da ong u leh wa da yoh ujor u kamwa 1500 tylli na u 2011 hadooh 2016 wei kiwa khayi da em ki hadooh 49, 051, 75 ngut wa tyngkheiñ ya ka aiñ.
Ka kuna wa pynchitom ya ki toh T. 5,000, katwa ha ka sien wa ar won da pynku cha ka T. 12,000 katwa ha ka sien wa le won u pynchitom deiwa kset patok hadooh ynru bnai.
Ha kini ki snem da yoh u daiñ kuna hadooh T. 14,92,100 hanlada duna kiwa kreh.
Kamtæ neiliang u Director da pynsñiaw u yei chitom wa chem ka tnat neidaw wa duna ka mang poisa ka sorkar jylla wada booh ko T. 6 klur kawa man du ya ka tulop donhi i wym dap wow pynche paidbah yei rukom kreh kani ka tnat.
Katwa hei yatoh won ya kiwa thied (customer) da pynkynmoo u ya ka ‘Jago Grahak Jago’ iwa mut wow thied ki paidbah katkam i dor wada booh wei lada em kiwa dai palat kamjooh i duna i khia wow ujor cha ka tnat yow leh yeiwa emkaam.
Discussion about this post