Jowai: Ha ka miet ka 16 tarik uni u bnai u Amos Syngkon wa 21 snem i rta da tynyap u (deiwa ksih) ya uwi u khynnah wa dang 9 snem wa tip kam u Edi Shylla wei hadien ini da noh u yei metyap uni u khynnah ha ka thlu-um wa dang chna ha Khliehlakweh, Mookyndur.
Ynne ka sngi kam chibynta i takit ki pulit, u Amos da phla wei da pynyoo u yeiwa jia ha katai ka janmiet, nyngkong da yah u (Amos) ya ki pulit cha i thaw wa chong dih kiad u wa uwi u lok u ha i thaw wa em harood ka sarokbah NH-44 iwa tip kam i Mookule.
Hadien ini da lai u samen na iwi i laad wa tip kam i Mooshyllong iwa haap pyn hapoh Mookyndur, wei da lai u lyngba i thaw wa tip kam i Khliehlakweh hadooh wa poi biang u cha ka sarokbah NH-44 ha i bynta wa tip kam i Moochynder wei heini (Mookynder) da mut u wow psiah ha iwi i dukan wa em ha rood sarok wa yang kawi ka kynthai.
Hadien kattu katni por da yoo u ya u diah kani kawa yang dukan cha chilliang sarok uwa dang liwan cha yung hadien wa pyndam ya ka lai chaad Carol.
U Amos da khut u ya uni u khynnah wei da yah u oo na khap ka luti wa wan u (Amos) cha ini i dukan wei manda poi ha i thaw wa rap jngai na ka sarok da ksih u oo na rdang hadooh wa yap u wei da ong u wa da ksaaid da kyrthai uni u khynnah tangwa ym em yoh laad u wow kiad.
Hadien ini da rah u ya i metyap uni u khynnah cha ka thlu um wa dang chna wei da noh u ya i metyap heitæ.
Dep u leh ya ini da uiñ biang u cha i dukan wei manda kylli ka payu uni u khynnah cheiwon u diah ko da ong u wa da lai ke u.
Ini i por da antaad u Amos toh kamwa 6:15 hadooh 7 waje i miet.
Hadien won da lai u na rood sarokbah wei da psiah u hapoh iwi i dukan iwa ym em jngai wei da chong yaleh Carom u hadooh 12 waje chiteiñ synyaw.
Kawa yang dukan da ong ko wa u Amos da psiah u heipor kamwa 8:15 i miet wei i yapdiah Carom toh boon iwa sied u Striker cha rood.
U Amos da ong u wa hadien ini da liwan u cha yung deiwa ku u da ka kari.
Ya u Amos da kem da ka chnong wei da kit ya oo cha Jowai Poice Station wei da beiñ joor ki leh ya ini wa leh u neibhah ym jooh em wa jia kam ini hapoh ka chnong.
Yei daw wa tynyap ya uni u khynnah hadooh katni ympu tip che wei daw pyntip katwa dang mih na i takit ki pulit.
Discussion about this post