Ynne ka sngi man ko ka sngi wow sahkynmoo heiwa da sdang i lehkmen dap 50 snem namo ka Golden Jubilee ka Jowai Government Girls’ Higher Secondary School heiwa u MLA ka Jowai, u Wailadmiki Shylla da man u kam u kongsan hei emlang ka Jt. Director ka School and Higher Education, ka AP Syiem kam ka symbood kongsan.
Ya ini i sdang lehkmen da pynman ha madan Jrisaleiñ heiwa da emlang ki Principal wa kiwa sikai warim ka skur, ki waheh chnong, ki khynnah warim ka skur, ki waheh niam wa kiwi kiwi.
Ka Principal ka skur, ka Dr. W. Sumer da khana ko ya ka parom ka skur heiwa ya ka Jowai Government School da sdang ha u snem 1941 deiwa emlang ki khynnah chynrang wa kynthai wei ya ka Government Girls’ High School da sdang ha u snem 1974 wei ki khynnah wa nyngkong wow yaleh Matric toh ha u snem 1976 wei kat dang lai ki snem dang boon ki khynnah wa wan cha kani ka skur nadooh kiwa na sor wa kiwa na palatsor.
Ka AP Syiem hawa e i klam da e khublei ko ya ka skur neibhah wa ynne man ko ka sngi wow sahkynmoo wow lehkmen yei chakri ka skur iwa la 50 snem wa da e sikai ya ki khynnah khamtam kiwa wan na ki manyung wa duna hei yoh i laa.
Da ong ko wa emkaam u pyrkhat iyi de wa ye u leh chooh bar u pyrkhat yeiwa dadep neibhah ka sorkar ymye ko wow leh samen khlem i krehlang kiwa sikai wa kamjooh ki bei ki pa.
Da ngait skem ko wa lyngba kani ka lehkmen daw ye u jop chooh ha ka thong yong i puræ puthi ha ki por wow wan neibhah ki khynnah man ki ka mynried yong ka jylla wa ka ri waroh kawi.
Da e ko leh ya ki kyntien sneiñ kyntu ya ki khynnah wow man kiwa minot khnang wow poi ki ha ka thong wa angnood ki.
Neiliang u Wailadmiki Shylla da e khublei u ya ka skur neibhah wa ha uni u snem da em soo ngut ki khynnah ka skur kiwa chah jied ha ka NCC wow chimbynta ha ka March Past yong ka Republic Day ha nongbah New Delhi.
Chooh chooh da ong u wa ha kiwi ki bynta ka ri wa ka pyrthai da yakhun yei puræ puthi ki khynnah kynthai tangwa heini da yoh u lehkmen dap 50 snem kani ka skur.
Da e khublei u ya kiwa da sdang ya kani ka skur wei hanla man iwa eh tangwa da ye u poi hadooh ynne ka sngi wei man iwa sñiaw sarong neibhah wa boon kiwa Phone ya oo wow paan yarap wow yoh Admission ki khynnah ha ka skur sorkar.
Da ong u wa heipor wa sdang ya ka sorkar man iwa eh bha ya ka chnat puræ puthi u kreh neibhah wa em 15,000 tylli ki skur ha waroh ka jylla wei ka sorkar u kreh ko ya waroh kini ki skur.
Heijooh i por da ong u wa ha ka dorbar wa dadep da klam u heiyatoh wa ka Hostel ki kynthai wow pynkrehkaam biang ya ka khnang wow myntoi ki khynnah wa wan na palatsor.
Da kyntu u leh ya ki khynnah wow chimkabu ya ka Chief Minister Scholarship Scheme heiwa ki khynnah wa pyndep ya ka SSLC daw yoh ki ya ka Scholarship wa Rs. 8,000 chi snem.
Da ong u leh wa daw yaklam wa ka sorkar wow pynman ya ka Career Counselling ha ki skur.
Chooh chooh da ong u wa da yaklam u wa u Montri Rangbah heiwa da yoh poisa wow chna ya ka Working Women’s Hostel ha ka District ha i thaw ka MTC wa em mar pyrchah ya ka Kiang Nangbah Government College.
Da ong u leh wa ym ye u wow leh iwon iwon samen tangwa emkaam yei krehlang yong waroh khnang wow ye u pynku ya ka District cha kawi tawon ka kyrdan.
Ha kani ka sngi da yoh leh i klam na ka Dr. EA Paswet kawa man kawi na kiwa Pass SSLC wa nyngkong dooh ka skur.
Da pynphooh ya ka sngi da ki chaad wa ka Mass Drill, ki rwai na ki khynnah wa katni kamjooh na ki khynnah warim ka skur.
Discussion about this post