Ka Chaad Sukra ka Seiñ Raij Chnong Tuber Kmaichnong da man ko kawa phooh wa phieñ ya kawa da pynman ha ka 6 tarik uni u bnai heiwa u Lasky Rymbai, Dy. CEM ka JHADC da man u kam u kongsan hei emlang ki waheh na ka Raij Tuber, u Langdoh ka Raij Tuber, ki waheh chnong wa kiwi kiwi.
Da yoh leh wow pynkup burom ya ki khon ka chnong kiwa da lehbha ha ki kyrdan puræ waphær waphær wa kiwa Pass bha ha ki Exam deiwa yoh 80% chaneiñ.
Da pynkup burom leh ya ki ar ngut kiwa da yoh kyrdan Doctor, kitæ u Dr. Wankyrpangmi Lyngdoh wa ka Dr. Pathaikiru Lyngdoh, ka Anisha Phawa ha ka kyrdan Nursing ha ka 1st Division, u Buhkhihsadamebiang Phawa ha ka kyrdan Bachelor of Pharmacy ha ka 1st Division, u Ha-o-shwa Dkhar uwa da yoh 1st Division ha ka SSLC wa u Ribait Phawa uwa da yoh ha ka 1st Division ha ka HSSLC.
Da yoh leh ya ki chaad da ki sur tynre, chaad kylla pliang, chaad kyllaiñ kti, chaad soo ngut na ki dong waphær waphær wei hadien wa kut ka Chaad Sukra, da pynwyrngia ya ki paidbah da ka chaad sñiawbha kiwa da pynyoo ya ki sap yong ki.
