Ka Kur Lamare Jaiñtia Pyllun (KLJP) ynne ka sngi da pynman ko ya ka Dorbar Kur (General Meeting) kawa 4 ha Madanbol ka chnong Tpep-Pale, Jowai heiwa da emlang u MDC ka Narpuh, u Emlangky Lamare kam u kongsan wa u Dolloi ka Elaka Nartiang u Salong Lamare kam u symbood kongsan heiwa da pynhær ki ya ka lama ka kur kam ka dak wa da sdang ka Dorbar.
Ha kani ka sngi da yoh i sneiñ kyntu na u Kordor Lamare uwa da klam hajrong ka phang “Ka Jingiatylli” u Heiporme Lamare hajrong ka phang “Ka Akor Burom & Ka Shongka Shongman” wa na u Marbiangki Lamare hajrong ka phang “Pynneh Pynsah ia ka Mariang”.
Ha kani ka sngi da pynkup burom ya u Dolloi ka Elaka Nartiang wa ya ki khon ka kur kiwa da lehbha ha ki Exam waphær waphær deilang wa kiwa yoh kyrdan PhD na kiwon kiwon ki skurbah neibynta u snem 2021-22.
Ya ka yalang da pynlai da u President ka kur, u Wompher Lamare wei da pynlait paidbah ya ka Riti Synchaar krehkaam (Constitution) ka Kur Lamare Jaiñtia Pyllun wei da yoh ya ki kyntien pdiang burom na u President ka Kur Lamare Jowai Unit, u N.K. Lamare.
U Emlangky Lamare ha kani ka sngi hawa e i klam da ong u wa i yatylli kam ka kur man i i daw wa da ye u pynman ya kani ka Dorbar Kur.
Da pynrap u leh deiwa ong wa ha kani ka Dorbar toh du ki kur Lamare, tangwa da ong u wa ha i kaam chongka chongman dang em kiwi ki kur kiwa yajan kiwa dang yatoh kur wa ka kur Lamare, kam ki Susngi, Papang wa kiwi kiwi kamtæ emkaam ya ka kur wow pyntip khnang wow lait na i chongkha khleh.
Ha kani ka sngi da yoh leh i klam na u Salong Lamare, u Defender S Lamare, Secretary Adhoc Committee ka Kur Lamare Meghalaya, ka bui (Report) wa tbian na u Asst. Secretary wa i e khublei na u Jerbiang Lamare.
Da pynphooh ya kani ka Dorbar Kur da i rwai pdiang burom ya ki para Kur Jaiñtia Pyllun da ki khon ka Kur Lamare Jowai Unit wa ki chaad na ki khon ka kur na ka Nartiang Unit wa kiwi kiwi.
