Ka Faith Academy School, Jowai ynne ka sngi da pynman ko ya ka Cultural Day hajrong ka phang “My Culture My Pride”, heiwa da pynyoo rong ya ki tiar, ki riam wa kiwi kiwi yong ki le tylli ki jaitbru ka jylla Meghalaya ki Khasi, Jaiñtia wa Garo.
Ya kani ka sngi da wan wai da u MDC ka Jowai Central, u A. Andrew Shullai, chirup i emlang u Chairman & Administrator ka skur, u Aris J Nongkynrih, ka Headmistress ka P. Jana wa ki dkhot ka School Managing Committee.
Ya kani ka yalang da pynlai da ka S. Suna kawa man kam ka dkhot yong ka SMC.
Neiliang ka Headmistress da pdiang sñiawbha ko ya u kongsan kamjooh ya ki manbei manpa wa kiwa da chah khut sñiawbha ha kani ka sngi.
Hawa e yei klam, u Aris J Nongkynrih, da ong u wa emkaam wow sñiaw sarong i yei man kyrpang i rukom im yong i kam ka jaitbru wei emkaam wow pynneh ya i rukom im wei kamjooh leh wow e yei stat i tip cha ki khynnah nadooh i rta wa dang khian deiwa ban joor leh yei emkaam wow pynksan ya “Ka Riti Dustur” waka “Ka Bei-Rymaw”.
Kam u kongsan ha kani ka sngi u A. Andrew Shullai, da yaroh u ya ka skur wa ki khynnah wa da pynman ki ya kani ka Cultural Day, deiwa ban joor wa emkaam wow sñiaw sarong ya i rukom im yong i kam ki jaitbru. Da ong u wa ka pyrthai da lai bha ko chaphrang wa ka juk katni (Technology) wei ye u yoh yutip smat lyngba ka Internet iwa da pymna ya ka pyrthai kawa khian bha wei ki bru da man ki kam ki tre chnong ka pyrthai. Tang deiwa pynman ya kam kani ka sngi daw pynkynmoo ko ya i dæ ya i tre i thied yong i wei wow ksoh u kune i ya “Ka Akor Burom” wa da yah da kiwa rim.
Chooh chooh da kitbok u ya kani ka sngi wow man ko kawa jop wei ka skur leh u dang tia ko chaphrang hei wow e ya i stat i tip cha ki khynnah.
