Jowai : Ka 19 tarik uni u bnai da man ko ka sngi sah kynmoo ya ka chnong Senaro, kawa haap hapoh Namdong Parish, yong ka Jowai Diocese, heiwa da tooid da ki hajar ngut ki para wangait yong ka balang Katholik cha ka Procession yong ka Namdong Parish.
Da man ko leh kawa chongchit heiwa da wan ki Lyngdoh niam da em leh u Sñiawbhalang Dhar, MLA wa kiwi ki sahep sorkar.
Da sdang ya ka lehniam da i pdiang burom na u Fr. Lambert Dkhar ya kiwa wan chim bynta waroh lang kam u Parish Priest. Da pynphooh chooh chooh deiwa em 207 ngut kiwa pdiang ya ka Sacrament wa 350 ngut ki khynnah khian kiwa pdiang ya ka communion wa nyngkong.
Ka lehniam Eucharists wakhooid da pyllai da U Bishop Victor Lyngdoh, u Bishop yong ka Jowai Diocese heiwa da khut u ya waroh ki paidbah u chit i maya blai maya niam ki.
Ka phang pyrdi yong ka Mass wakhooid toh hajrong i ktien u Blai wa ong toh u man kiwa janai kam u pa bneiñ yong ki wei wow maya ya kiwa choon ya ki.
Ka nongmuna wa bha dooh toh wa u Jisu da sikai ya kani ka yurim kamjooh leh da yalap u wei da maap u leh ya kiwa leh bakla ya oo wei ha u dieñphna da maap lut u ya uwa tooh wa da leh bakla ya kiwi ki bru.
Ka Balang Katholic ka dang thooh ko ki laad ki luti wow yahluti yei sikai u Jisu heiwa u Deacon Stephan uwa da dooh yei mynsien ha ki kti kiwa choon ya oo da maap u ya ki yeiwa leh ki. U John Paul leh da leh u kamjooh ya kiwa choon ya oo deiwa hun u u lai cha patok ha Mehmet Ali Agca deiwa maap ya kiwa leh beiñ ya oo.
Ha ka por lai procession yong ka Eucharist wa khooid, waroh da chim bynta lang wei da yoh leh ya i klam wa sñiawsuk na u Fr.Bresson Paul Rani u Rector yong ka Christ King College, Shillong hajrong ka phang “Ka jingim jong ki kristan dei ka jingiaid pilgrim bad iaid procession.”
Da ong u wa lada emkaam i u em ha i ngait wa skem emkaam i u em i ngait wa sakhiat ha u Jisu wei ym hoi u artatein i.
Da pynkut da i ngooh blai kyrkhu kyrdoh na u Bishop Victor Lyngdoh.
Discussion about this post