Jowai: Ka yungkrehkaam u DC ka West Jaiñtia Hills District ynne ka sngi da kynmoo warom ko ya ka Meghalaya Day wa 46 ha District Library Auditorium, Mynthong Jowai.
Ka Meghalaya Day haap ko ha ka 21 tarik tangwa neidaw wa man ko ka sngi Bibar da pynman ya ka lehkmen ynne ka sngi.
U SC Laloo, ADC ka West Jaiñtia Hills hei klam wai phang yong oo da klam u chaphang ka yakhih wow yoh ya ka jylla Meghalaya heiwa ha ka yakhih ym em joo chi joo i snaam wei i daw hi wa sdang ka yaleh toh hadien wa ka jylla Assam kwah ko u pynman ya ka ktien Assamese kam ka ktien wow klam ha waroh kawi ka jylla.
U symbood kongsan won u B.N. Lamare hei klam yong oo da kynmoo u ya ki por wa pynman ya ka yakhih wow yoh ya ka jylla heiwa ki kyntien wa ka-it ki paidbah u kbai toh “No Hill State No Rest” wei heipor wa yoh jylla nyngkong da em du ar tylli ki District hapoh ka jylla.
Da ong u leh wa du ka puræ puthi kawa ye u wow wanrah ya i che na i doom wei ka jylla em ko boon ki bru kiwa hoi khih hoi khan nei krehchitom ki kamjooh leh kiwa kreh sorkar kiwa wan na ki chnong nongkyndong kiwa da ku cha ki kyrdan wa heh.
Da pynkynmoo u leh wa toh u man kiwa sñiawsarong kam kiwa na Meghalaya kat cha wa lai i wei u booh i ya ka thong pynku ya ka jylla.
U kongsan ha kani ka sngi u DC ka District u R. Rapthap da ong u wa kynmoo u wa dang khian heipor wa yoh ki yung yong ki hi hadien wa sah yung wai ki boon snem man ko ka sngi wa kmen hadooh kattæ kattæ neibhah heipor wa sah yung wai em boon ki kyndon wa booh ki tre yung kamtæ i yoh jylla Meghalaya man ko kamwa yoh i yung yong i hi.
Da klam u leh chaphang i emkaam wow kyntu ya ka puræ puthi hapoh ka jylla, i pynman ya ka chnong ka thaw kawa khooid khamtam katni wa ka District da sdang boon kiwa uiñke suwari kiwa daw rah ktien lada ka thaw man ko kawa tngit.
Da pynbna u leh wa ka District daw sdang ko leh ya ka Thumb Impression Free Campaign ka wow yarap ya ki wakreh Muster Roll wow soi pyrtuid yow lait ki u chon dei kti.
Discussion about this post