Ynne ka sngi da lehwarom ya ka sngikha yong u Deen Dayal Upadhyaya ha Deen Dayal Upadhyaya Community College, ka College wa em hapoh yong ka skurbah NEHU kawa em ha chnong Wahiajer, West Jaiñtia Hills District, heiwa ya kani ka lehwarom da sdang hei step heipor 5:00 waje da ka yakob phet namo Marathon heiwa da wan chimbynta chynrang wa kynthai.
Heipor kamwa 9:00 waje i step da em ka Yoga Class, yeiwa da pynbood da ka yalang ha Madan Stadium Wahiajer heipor 11:00 waje i step ya kawa da wan sakhi da kiwa chong chnong ka Wahiajer kamjooh kiwa na jan chnong.
Ha kani ka yalang da pynlai da u MLA ka thaaiñ uwa man leh u montri ka sorkar jylla, u Sniabhalang Dhar, wei da yoh ya ki kyntien pdiang burom na u waheh chnong ka Wahiajer, u Sanwotki Laloo wa i sur pdiang burom na kiwa puræ ha kani ka College.
Ha kani ka sngi da emlang leh u MDC ka JHADC u Brightstar Chyrmang, u Pastor NS Phawa, u Henry Lamin uwa man u Principal kani ka College wa kiwi kiwi.
Neiliang u Vice Chancellor ka NEHU u PS Shukla kam u kongsan ha kani ka sngi da batai u chaphang u Deen Dayal Upadhyaya ka rukom im ka rukom khreh ka yong oo, kamjooh leh da e khublei u ya ka chnong Wahiajer wa da e sñiawbha ko ya i thaw wow em kani ka chnat ka NEHU heiwa daw yoh myntoi ki chnong kiwa marjan.
Heipor 2:00 waje i sngi da em ka yalehke Football hapyrdi ka Wahiajer pyrchah ya ka Ummulong heiwa ka Wahiajer da jop ko lyngba i chut Tie-Breaker.
Ya kani ka sngi da pynkut da ki kyntien ekhublei na u Wolnish Rymbai uwa man leh u Coordinator yong kani ka College.
