Jowai: Ka Khynroo Kyllood Chilliangraij Ñiamtre Committee ha ka sngi Thymbleieñ 23 u Naikhyde hapyrdi i sakhilang u Pa Dolloi Elaka Jowai, u Puramon Kynjin wa kiwi kiwi kiwa chah khut sñiawbha da pyndep ko yei leh burom kyrpang ha Yungwalieh heiyatoh wei dap Ynru snem i lai luti ka Shlem Sikai Niam kawa da seiñ ha u snem 2013.
Ha ka Yalang yahkhmat wa tbian ka Fairlinda Pde kam kawi na ki manbei da yieñ ko wow e ki kyntien pdiangburom pynbood won i ngoohblai ngoohsyiem da u Sniawhi Pde, Secretary Niamtre Committee Chilliangraij, i parom watbian chaphang i lai luti ka KKCNC da pynsñiaw da ka Chanlang Pde, Chairman KKCNC, ki kyntien yaroh wei e mynsien ya waroh kiwa wan sakhilang hajrong ka thong i pynkhlan ya ka Niamtre da pachat na u Damehiwot Pde, Waheh Chnong wa na u ma Wansalan E.Dhar, Secretary Ñiamtre Committee, Seiñraij katwa ka Dabiang Rngad, Secretary KKCNC ha ka bynta wakut yieñ ko wow e ki kyntien khublei.
U Chiboon Lyngdoh hei yachimbynta wow e kyntien ha kani ka sngi, da ong u i wan ka jaitbru chirup wa ka niam man i sñiawsarong wakhroo ya i kam ki pateiñ kiwa ksoh wa kune yei man kyrpang ka jaitbru neitæ won kyrsu kyntu u leh dei wa ong, man kiwa sñiawsarong yei yong-i dahi wei ham yookwah yei yong kiwi neibhah lada man katwa man i yong-i tæ i yong-i. Khaddooh chwa wow chong iwa kyrpang chooh chooh kyrsu kyntu dei wa ong ya ki yahkhmat yaleh katwa ye walah wow wanrah i rukom krehkaam wa khooid wa hok khamtam hei liang i sap i tap.
Ka Hima Lakiang hawa e ya ki kyntien kam ka symbood kongsan, kdar kyrpang ko ya ka bynta wa yatoh wa ki manbei deiwa ong kam ki manbei kiwa em ya ki khon ki ksu, man kiwa skem ka yurim wow sikai u tyoor luti yei tip niam tip rukom khnang wa i maya niam maya Blai u man i iwa mandoh mansnaam hei rynyieñ rynyoit wa hei pyrkhat pyrdaiñ yong ki kat nang mih ki sngi ki por.
U Pa Dolloi, Puramon Kynjin, hei e ya ki kyntien kam u kongsan da yaroh u ya ki wa yahkhmat ka Khynroo Khyllood Niamtre Committee, Chilliangraij kiwa da em i yoo jngai wow sdang ya kani ka Shlem Sikai kawa ha kini ki sngi ki por dawa chooh chooh wow pynsarot pynkyntang yei man yong ka dei wow sai u pynmih leh kiwa sikai kiwa tbit wachemphang, iwa khaddooh pachat u ki kyntien e mynsien deiwa ong, iwon iwon iwa leh dei wa chaniah langeiñ hei bor ki blai ki syiem poi bait i ha wamut wamang dei wakuplang hei man i long yong-i yei maya niam maya Blai.
Nalor i klam, i kappe ha kani ka sngi wow pynchoh pynwyrngia, pynphooh pynphieñ chooh chooh ya kani ka Lyngkhooh snem da em ki chaad, ki rwai surtre wa yoosuk, yoochongkun wa da chimbynta da ki khon ka chnong Chilliangraij kamjooh leh na ki khon khynroo khyllood ka Seiñraij Jowai, ka Shlem Sikai Tynre, ka Seiñ Tyllilang Niamtre Ladthadlaboh, ka Loompyrdi Iongpiah wa na ki khynnah ka Niamtre Loomiongkjam.
Discussion about this post