Jowai: Kamwa man ha kiwi ki thaw yong ka Ri India i leh warom Independence Day da ki bor sorkar, ki bor pynlai chnong pynlai thaw wa kiwi kiwi ki seiñ man i iwa yoosuk yoophooh yoophieñ, ha chnong Shangpung leh ya kani ka sngi da lehwarom ha madan Hula, Moosyiem heiwa kiwa chong chnong nadooh ki khynnah hadooh ki waheh wasian dawan ki wow chimbynta hei sakhilang ya kani ka sngi.
Ha kani ka sngi ha Shangpung ya ka lama le rong yong ka Ri India da pynhær da u Gavin Mylliemngap, MLA Sohra Constituiency hei emlang u Block Development Officer, Laskein C&RD Block u F.B. Basan, MCS, u Dolloi ka Elaka Shangpung, ki heh sorkar yong ki chnat krehkaam waphær waphær wa em hapoh ka Laskein Block, ki waheh chnong, kiwa sikai wa kiwi kiwi kiwa chah khut sñiawbha.
U Gavin Mylliemngap hei e kyntien kam u kongsan heiyatoh wa kani ka sngi, nyngkong kdar u wow kynmoo warom kynmoo maya ya ki khlawait ka Ri kiwa da yaleh neibynta wow yoh ya kani ka sngi khlem da mylliñ leh ya u Kiang Nangbah, U Tirot Sing Syiem wa u Patogan Sangma kiwa man ki khlawait ka jylla kiwa yieñ yaleh pyrchah wa ki bor ka sorkar Pharæng da ka luti yong i maya Ri maya jaitbru.
Neitæ hawa kdar won u ha kani ka juk wa katni kawa da yoh yei synchaar laitlooid pynda-i ya i hei pait i pynlai ki bor sorkar wa ksoh yei bor synchaar hapoh ka Ri India, da khana u wa ka sorkar hi neibynta i suk i saiñ, i roi i paar wei miat i bha yong waroh kiwa chong chnong hapoh ka jylla dadep booh thong ko wow kreh kyrpang ha ki soo tylli ki paya kawi wa yatoh wei puræ puthi wei chait i khiah, i kyntu kynrong yei kaam rep kaam riang, i kyntu kynrong ya kiwa chong chnong da ka luti yong i seiñ khih seiñ khan yong-i dahi, i chongsuk chongsaiñ wa kiwi kiwi.
U Gavin dei sñiawsarong ya ki kaam kiwa ka sorkar da leh ko chooh chooh da khana pynsñiaw u leh yei dor ka poisa kawa da pynlut ha ki bynta waphær waphær yong i kreh i kaam iwa man neibynta i myntoi kiwa chong chnong wei miat i bha ka imlang sahlang waroh kawi.
Chooh chooh ya kani ka sngi nalor ka March Past kawa da wan chimbynta da ki 22 tylli ki skur da pynchoh pynwyrngia won leh ya kiwa wan sakhi dei chimbynta ki khynnah skur wow pynyoo sap ya ki Drill ha ki rukom waphær, ki chaad wa ki rwai.
Pics by Soolangki D Laloo
Discussion about this post