Ka chnong Jowai da pynkhreh ko wow pdiang ya ka sngi Christmas deiwa phooh wa phieñ ha uni u snem kamwa da jooh leh ha kiwi ki snem heiwa ha uni u snem leh ka chnong ka thaw wa ki yung ki sem ki bru da man ki kiwa da kylla dur da ki pynriam khrik-khrak, ki khloor Christmas wa kiwi ki jait pynriam wa harukom.
Kiwa boon ki dong leh da pynriam ki ya ki luti ki syngkieñ, ki rood sarok wei kiwa rap heh i pynriam toh ha Khimusniang kawa da em kiwa boon ki rukom wa kyrpang wa da booh ha tymbud sarok wa iwi iwa rap heh wa da chna kyrpang.
Ka Ladthadlaboh leh da wai ko da ka Christmas Garden hajan ka madan Dai Masai ha i thaw wa em ka Park wei ini i pynriam heini leh man i iwa miat wei iwa phooh wa phieñ.
Ki yungmane ki Balang waphær waphær leh man ki kiwa da pynriam bha wei kam chibynta wow pdiang ya ka sngi Christmas heiwa daw pynman leh ya ka yaseiñ pyrdi synyaw namo ka Midnight Service.
Hachwa ini da pynman leh ya ki Bonfire wa da chimbynta da kiwa boon hei wow rwai yaroh ya ka sngikha u Jisu Khrist kamjooh wow chaad lehkmen.
Ha ki sngi chwa, da pynman leh ya kiwa boon ki lai Carol dei miet wa dei sngi.
Neiliang yong i waroh ha u WYRTA leh e khublei Christmas wa suk wa kmen ya phi waroh.
