Ka Chaad Sukra 2022 ka Seiñ Raij Mukhla da man ko kawa wa phooh wa phieñ ynne ka sngi ha Madan Ei Iadaw Rong Mukhla. Ya kani ka Chaad Sukra da wan wai ya ka da u Thombor Shiwat, CEM JHADC kam u kongsan hei emlang u Wailadmiki Shylla, MLA ka Jowai kam u symbood kongsan, deiwa sakhi lang u Ailad Bhoi, MDC Mukhla Wahiajer, u Lakhon Dkhar, MDC Khliehtyrshi, u Phasmon Dkhar, MDC Musniang-Rngad, u Octomewot Lamin, Nominated MDC, u R M Garod, Dolloi Elaka Nangbah, u Puramon Kynjing, Dolloi Elaka Jowai, u Deibormi Thubru Pator ka Raij Mukhla, u Nirajan S Manar, Vice President Seiñ Raij Shangpung, u Wom Chyrmang, President Seiñ Kyntu Seiñ Raij 12 Dolloi wa ki sahep sorkar na ka chnat PWD nadooh u Engineer, SDO, JE wa kiwi naka PWD South Division wa ka PWD Central Division Jowai chirup wa kiwi kiwi de.
Ha chwa wow sdang i lehkmen, da yoh chwa ya i ngooh Blai na u Pa Langdoh ka Raij Mukhla u Waheh Wanbha Lyngdoh, da yoh i pynhær ya ka lama ka Seiñ Raij Mukhla da u kongsan uwa da pynsñiaw yei sñiawngooh ya ka Seiñ Raij Mukhla wada pynman ko ya ka Chaad Sukra kawa chisien chi snem kam ka dak wow pynneh pynsah ya ka dustur riti wei da kyntu u ya ki khon khynroo ka Seiñ Raij wow mih chakhmat wow sikai put sikai tem ya ki ksiñ wa kiwi ki tiar tem tynre.
U CEM da pynbna paidbah u leh ya ka poisa yarap naka JHADC kawa T. 1 lak cha ka Seiñ Raij Mukhla.
Neiliang u Wailadmiki Shylla kam u symbood kongsan da yaroh u ya ka Seiñ Raij Mukhla wada ye ko u pynman ya ka Chaad Sukra kawa jop wei kawa phooh wa phieñ wei da kyntu u leh ya ki khon ka Seiñ Raij Mukhla wow mih ki chakhmat wei wow ya chimbynta ki heiwon heiwon i kaam wa ka Seiñ Raij Mukhla da khut ko ya ki.
Ha kani ka sngi da yoh leh i yaklam pdiang da u Standbyme Sari, Auditor ka Seiñ Raij Mukhla wei kamjooh leh i klam tbian na ka Yoobha Sumer, President Seiñ Manbei Seiñ Raij Mukhla wa kiwi kiwi de.
Ya ka lama ka Seiñ Raij Mukhla da pynhiar ya ka da u Octomewot Lamin, Nominated MDC katwa ya ki kyntien e khublei da e da ka Bei Langdoh ka Seiñ Raij ka Lossmina Lyngdoh.
