Jowai: Ka Seiñ Raij Chnong Wapung Chnong kawa haap hapoh ka Seiñ Raij Tuber da pynman ko yaka Dorbar Kyrsu Kyntu ynne ka sngi ha Wapung Chnong ha Madan Chaad Sukra ka chnong, wei ha kani ka Dorbar da wan ya chimbynta da ki khon ka Seiñ Raij Chnong Wapung Chnong wei kamjooh leh ki Seiñ Raij waphær waphær.
Da sdang yaka dorbar da i pynhær ya ka lama ka seiñ da ka Ieris Ryngkhlem wa ka Pretty Dkhar wei bood saka ngooh ka dem da u Kduplang Ryngkhlem, ya ka dorbar da pynlai da u Damutmiki Dkhar u President ka Seiñ Raij Chnong Wapung Chnong.
Ha kani ka dorbar da wan chimbynta leh da u Bewill Sylla President ka Seiñ Raij Tuber wei da yoh leh ya i klam na oo hajrong ka phang “Ka Maian Blai ha u Ynñiaw Wasa” uwa da ong wa ki khon khynroo khyllood ka juk wa katni ym sñiawthooh ki yei mut yong i kyntien Maian Blai iwa mut wa kini ki kyntien pynyabi lang ki hapyrdi u khon Ynñiaw Wasa Ynñiaw Wasung wa u Trekirot, uwa man u syiem yong iwa thaw waroh ha kani ka pyrthai, da ong u leh wa ini i e ha i ki pateiñ toh wow pynneh pynsah ya ka niam ka rukom na ki longchwa manchwa iwa man leh i e da i bor ki Blai wei ym ye i wow leh kulmar ya kiwon kiwon ki kaam niam kaam rukom khlem da yoh yei bichaar na u Trekirot, da ong u leh wa kani ka pyrthai em ko le syrtap kawi toh ka Sih Bneiñ,ka wa ar toh ka Pyrthai Chong Wasa wa kawa le ka toh ka Niam Ra.
Ha kani ka Dorbar kyrsu kyntu da em leh wa u Dolloi ka Elaka Jowai u Puramon Kynjin wei da yoh leh na oo yei klam hajrong ka phang “Ka Niamtre, Ka Niam Tipbru Tipblai.” Ha kani ka Dorbar da em leh u Lasky Rymbai u MDC ka thaaiñ kamjooh u Dy. CEM ka JHADC uwa man leh u tre chnong kamjooh leh u khon ka Seiñ Raij Chnong Wapung Chnong uwa da ong cha ka District Council wow thooh laad kammon wow pynneh yaka niam ka rukom, ka dustur ka riti wa ka kheiñ kur kheiñ kha. Wei da pynkhreh wow wanrah yaka “Clan Bill” kawa yatoh wa ki kur ki jait kiwa em hapoh ka ri-loom Jaiñtia.
Ya kani ka Dorbar Kyru Kyntu da pynchongchit pynphooh pynphieñ ya ka da ki Chaad Tynre i na ki chnat Seiñ Raij waphær waphær kam na ka Seiñ Raij Mukhla, Seiñ Raij Narwan, Seiñ Raij Rashai, Seiñ Raij Khloo Kynrin wei kamjooh ruh na ka Seiñ Raij Chnong Wapung Chnong wa Seiñ Raij Chnong Tuber Chohchrieh.
Discussion about this post