Ka Lympung wa 33 ka Sengkhihlang da poi ko cha wakut ha ka 16 tarik uni u bnai ha chnong Kyrphei kawa haap hapoh ka Seng Khasi Tyrsad Pyllun, wei ya kani ka Lympung da sdang ya ka nadooh ka 14 tarik deiwa wan sakhi ki khon ka Bri u Ynñiawtrep Ynñiawskum kiwa da wan tooid da ki phaw hajar ngut.
Ha ka sngi pynkut da sdang nadooh i por 10:30 i step deiwa yahkhmat u H. Robin Kurbah, President ka Sengkhihlang wei da pynlai ya ka da ki manbei wa kynthup ya ka Santina Mawlong, Asst. General Secretary ka Sengkhihlang wa ka Solony Bareh kawa man ka Executive Member ka Sengkhihlang.
Ha kani ka Lympung da yoh yei klam pdiang burom na u Dlipstar Rani, President Seng Khasi Tyrsad Pyllun wei ya ka General Report da e da u General Secretary, u Mario Biam, da yoh leh yei klam phang na u Pet Dhar, Executive Member ka Seiñ Kyntu Seiñ Raij 12 Daloi hajrong ka phang “Haba Khlain ki Nongialam Skhem ka Jingngeit Niam” wa kamjooh leh na u Egenstar Kurkalang uwa man kam uwa e buit ka kynhun Samla Sengbah Nongshat Nongkhein hajrong ka phang “Ka Thymmei Longbriew, ka Jait Bynriew u 7 Trep 7 Skum”.
Da yoh leh yei chaad tynre na ki chnat Seiñ Raij waphær waphær deiwa sakhi lang da u Deputy Chief Minister, u Sniawbhalang Dhar, u Mathew Beyond Kurbah, MLA Mawphlang Constituency, u Ollan Suiñ, MLA Mawsynram Constituency, u Wailadmiki Shylla, MLA Jowai Constituency, u Lamphrang Blah, MDC KHADC, u Lasky Rymbai, Deputy CEM JHADC, u J. Treilang Suchiang, MDC JHADC, u Ainam Syiem, u Syiem ka Hima Mylliem, ki Dolloi nadooh u Puramon Kynjing, Dolloi Elaka Jowai, u Salong Lamare, Dolloi Elaka Nartiang, u Copiousness Daw, Dolloi Elaka Nongjngi deilang ki Langdoh, ki Sagnot, ki President, Secretary yong ki chnat Seng Khasi wa Seiñ Raij waphær waphær.
Neiliang ka Sengkhihlang da e khublei ko leh ya ka Seiñ Raij Narwan kawa da e sñiawbha da ki Moopynyieñ sahnaam yong kani ka Lympung wa 33 ka Sengkhihlang kamjooh ya waroh ki Seiñ Raij wa Seng Khasi, ki chnat sorkar deilang wa ki pulit kiwa da pynman ya kani ka lympung kawa jop.
