Ka Dorbar Kur kawa 7 (Ynñiaw) yong ka Kur Lamare Jaiñtia Pyllun kawa da pynman ha ka 14 tarik uni u Duyatra (January) 2026 ha ka chnong Nangbah, West Jaiñtia Hills District da man ko kawa phooh wa phieñ.
Ha kani ka yachem wa chisien chisnem da wan chimbynta da ki khon ka kur na Ri Bhoi, East Khasi Hill, Bangladesh, War Jaiñtia, Mylliem wa na East wa West Jaiñtia Hills District.
Ha kani ka sngi da wan wow ya emlang da u Dr. Sylvanus Lamare (Principal warim ka St. Edmund’s College) kam u kongsan deilang u waheh Laiwan-I Lamare na Mowkaiaw kam u symbood kongsan chiruplang u Rev. Fr. E.M. Lamare heiwa da e u i kyntien kyrsu kyntu ya ki para kur wei da yoh leh i parom tbian yong ka Kur Lamare ha Mylliem da u waheh P. Lamare uwa na Mylliem.
Da sdang ya kani ka Dorbar Kur deiwa pynhær ya ka lama kur da u kongsan chirup u symbood kongsan deilang ki waheh wa kiwa kitkaam yong ka Kur Lamare.
Neiliang ka kur Lamare kam wow pynchlur ya ki khon ka kur da e khusnaam ko cha kiwa lehbha ha ki Exam waphær waphær kamjooh kiwa da yoh Ph.D na kiwon kiwon ki Board wa ki skurbah neibynta u snem 2023-24 kiwa da em 18 ngut waroh.
Heijooh i por da chim ya ka bynta wow pynkup burom ya ki ar ngut ki MDC na ka Kur Lamare, u waheh Reformingson Lamare wa u waheh Nehimaia Lamare deilang ki dkhot kreh kaam yong ka Kur Lamare.
Ha ka yalang da wai phang da u President ka kur, u Wompher Lamare wei da pynlait paidbah u ya ka E-Book ha ka WhatsApp Group yong ka kur kawa da thoh da u Dr. Sylvanus Lamare, kawa da e pyrtuid “Ka Jinglum jingtip shaphang ki khana kiba don ki jingiadei bad ka kyrteng Lamare Bynta-1 (Shwa ka juk thoh)”.
Hawa pachat ya ki kyntien ha kani ka yalang, neiliang u kongsan da chim u wow kyrsu kyntu wow thoh u tar (Document) ya ki parom yong ki kur kiwa da embyntalang ha ka imlang ka sahlang lane ha ka History katkam ka juk wa katni. Da pynchlur u ya ki dkhot ka kur wow sdang da ka Research Committee ki wow thooh bniah ya i thoh i tar chaphang ka Kur Lamare. Da chim u leh wow pynkynmoo ya ki kyntien im sngi (Motto) yong ka kur kawa ong ‘Syrdoh I Maya’ wei da ban joor u leh ya ki kyntien wa da ong da u phadar Lamare iwa man kamni “Lamare is not just a title but Lamare is our blood”.
Da pynchongchit ya kani ka sngi da i rwai i chaad na ki khon Kur Lamare kam na ka Nangbah Unit, Raliang Unit, War Jaiñtia Unit wa na ka Mobakhon Unit.
Ha kani ka sngi, ya ki kyntien pdiang burom da yoh na u waheh Kordor Lamare, katwa ya ka Report tbian na u Secretary ka Kur, u Shanbor Lamare wa ki kyntien khublei na u Manbha Lamare.
Da pynbna paidbah leh wa ka Dorbar Kur kawa 8 (Phra) daw pynman ka ha chnong Ummulong ha u snem wow wan.
Discussion about this post