Ka Procession Eucharist wa da pynman ha Parish Umkiang, East Jaiñtia Hills District ynnin ka 18 tarik da man ko kawa yoo chongkun wei phooh phieñ deiwa wan chimbynta ki paaid wa ngait Catholic na ki balang chnong waphær waphær wa haap hapoh ka Umkiang Parish wei da em leh 115 ngut ki khynnah wa yoh pdiang Sacrament wa nyngkong kamjooh leh i wan chimbynta ka Don Bosco Band wa kiwi de.
Ka phang yong kani ka sngi toh “La pyndep ia ka ia bad ka hima u Blei ka la jan. To phin kylla ka ba mut bad to ngeit ruh ia ka Gospel” (Mk 1:15).
Yaka Procession da sdang heipor chiteiñ sngi na Holy Cross Parish Umkiang wei da lai ter ter u sarok National Highway yong ka chnong Umkiang deilang i put i tem ka Don Bosco Band kamjooh i rwai wei ngooh Blai ki paaid wa ngait katwa dang lai kjat.
U Fr. Lawrance Wanniang hawa pachat yei klam kyntu kyrsu hadien ka Procession iwa yatoh waka phang yong kani ka sngi ong u, i ngait khlem i leh man i iwa yap, kamtæ hawa ngait toh u wan tikna cha ka yaseiñ, cha ka Eucharist wei toh u duwai yow Blai.
Yooluti u wa lyngba kani ka sngi u pynskem chooh chooh ko yei ngait, wei u pynyoo leh yei ngait ha u Blai da ki kaam wa leh.
Heipor step chwa ka Procession da em ka lehniam Mass Wa Khooid wa pyndep da u Vicar General ka Jowai Diocese, u Fr. Martin Shylla hei emlang ki lyngdoh na ki Parish waphær waphær najrong ki paaid Catholic.
Hawa e yei klam sneiñ klam khroo, u Fr. Martin Shylla da klam u heiyatoh i ngait wei kylla wamut, heiwa ka por da toh u man kiwa pynkhreh ya idæ. Kyntu haroh u wow jan cha u Blai wow yasuk wow Blai kamjooh waki para bru.
Discussion about this post