Ka High Court Meghalaya da chong bichaar biang ko ya ka mukotduma ka Central Bureau of Investigation (CBI) Shillong pyrchah ya ka M. Ampareen Lyngdoh ynne da u Chief Justice, u I.P Mukerji heiwa da pyntip hakhmat yong oo da u DSGI, u Dr. N. Mozika wa dadep pynkhreh yei pyrtuid ki 492 ngut kam ki sakhi heiwa na kini da em 28 ngut kiwa dadep u chah kylli takit.
Tangwa ha ka hukum wa dadep pynmih chwa da phah wow pynduna noh ya kini kiwa man kam kiwa sakhi yow em du da kitu kiwa tip tikna chaphang kani ka kaam.
Kamtæ ynne da pyntip wa da rai wow pyndam noh yei pyrtuid ki 200 ngut wei u takit ya 292 ngut wei yeini dang yang yei mynjur ka CBI Headquarter wa em ha New Delhi.
Ka High Court da phylla ko wot hadien wa pynmih ya ka hukum ha ka 09-12-24 yow pynduna ya kini kiwa sakhi tangwa dang pynslem bait wow leh yeini yow pynsmat u pyndep noh ya kani ka mukotduma.
Ynne da bichaar leh yei dawa wa da e hapoh ka Section 482 ka Criminal Procedure Code yow pynkut noh ya kani (Criminal Proceeding).
Ka High Court da ong ko leh wa toh u leh yeini yow e laad ya ka CBI wow pynmih ko yei pyrtuid wa khaddooh kiwa sakhi yow ye u takit ya ki.
Ya kani ka mukotduma daw chong bichaar biang ha ka 09-04-25.
Kani ka mukotduma toh kawa da emlang hadooh 5 tylli wa kynthuplang ya ka mukotduma u Jeffrey D. Sangma heiwa ka Ampareen kawa man kam ka Montri sorkar da chah pynbaad ki wa emkti ki wow pynkylla ya ki Marks kiwa yalehke kreh kam ki Assistant Teacher ha ki Lower Primary School ka sorkar Meghalaya ha u snem 2008-09 wei da chimkti yei takit da ka CBI kawa da sahkut kattu da palat 13 snem.
Discussion about this post